Mizoram leh Assam CM an inkâwm CM pahnihin Amit Shah an hmu

Union Home minister Amit Shah ruahman angin chief minister Zoramthanga leh Assam chief minister Himanta Biswa Sarma te chu November 25, Ningani zan khan New Delhi-a Assam House-ah an inkâwm a, thil pawimawh chi hrang hrang an sawi dun.

Zoramthanga leh Himanta Biswa Sharma hi nimin tlai dar 5 khan Union Home minister Amit Shah hoin a pisaah an inkawmho leh a, he thu ziah lai hian an inkawmhonaa an sawite kan hre hman lo.

Thuthar thehdarhtute zawhna chhangin Zoram-thanga chuan, Amit Shah nen chuan ṭhian ṭha tak, unau ang mai an nih thu sawiin, "Inkawmna hun ṭha tak kan nei thei a ni. Inṭhianṭhatna hun rei tak chhung kan neih tawh hi tihpun zel kan tum," a ti.

Amit Shah-a'n a sàwm angin CM Zoramthanga hian Assam House-ah Ningani zan khan zanriah a ei a, chumi hnua thuthar thehdarhtute zawhna chhangin, Amit Shah chuan ṭhian dun an nih angin hlim taka zanriah an kîl bak chu thil pawimawh sawi an neih loh thu a sawi.

Mizoram sorkar thu-chhuah tarlan danin, Mizoram leh Assam chief minister-te chuan state pahnih tana hmasawnna tur kaihhnawih thil chi hrang hrang an sawi dun a; state ramri chungchang an sawi dun thu erawh tarlan tel a ni lo.

Zoramthanga chuan, Hachhek tlangdunga kuhva hring thar chhuah, a hralhna lama Patharkandi district, Assam-a thuneitu ṭhenkhatin Myanmar aṭanga lut nia an ngaih avanga an lo hnar ṭhin thu a sawi a; kuhva chínga eizawng Mizo tam tak tan harsatna sutkian a nih theih nan Assam mite'n Mizorama kuhva thar an lo hnar ṭhin chu titawp thuai turin Assam CM a ngen a ni.

Zoramthanga hi Delhi Mizoram House-a resident commissioner Amjad Tak, OSD to CM Rosangzuala leh sorkar official dangte'n an ṭawiawm a; Himanta chu Agriculture and Veterinary minister Atul Bora-a'n a ṭawiawm.