Hâlpuah pual street campaign

Fire & Emergency Services (FES) chuan November 25, Ningani zan khan district khawpui hrang hrangah Krismas leh kum thar vuakvêta hâlpuah leh hâlmawi hâl lo tura inzirtirna Street Campaign an buatsaih. Aizawlah chuan FES director C Lalthanmawia'n Vanapa Hall kawt aṭangin street campaign-a tel turte a vailiam.

Street campaign-ah hian Mizoram sorkarin Krismas leh kum thar vuakvêta a khap - hâlpuah, hâlmawi leh a kaihhnawih thilte hâl lo tura mipui ngenna leh zirtirnate aurinna hmangin an tlangaupui a; boruak a tihbawlhhlawh dan te, hriselna a tihchhiat theih dan leh kângmei a tihchhuah theih dante an puang a ni.