Mizoram aia hripui vei hmuh thar tamna state pali a awm

November 25, Ningani khan Mizoramah Covid-19 vei mi 444 hmuh chhuah a ni a, India ramah Mizoram aia hmuh thar tamna state pali a awm. Nimin khan hripui vei dam tawh mi 343 chhuahtir an ni a, Covid-19 vangin mi pakhat a thi.

Covid-19 vei Ningania hmuh thar mi 444-te chu mipa 207 leh hmeichhia 237 an ni a; ZMC laboratory-a hmuh chhuah 11, TrueNAT hmanga hmuh 34, RAT hmanga hmuh 398 leh Fluorescent Immunoassay (FIA) hmanga hmuh pakhat an ni.

IDSP record angin, Mizoramah Covid-19 vei 1,33,562 hmuh chhuah a ni tawh a, mipa 64,600 leh hmeichhia 68,962 an ni a, mipa aiin hmeichhia 4,362-in an tam zawk. Nimin tlai dar 5 thleng khan mi 1,29,080 (96.64%) chhuahtir an ni tawh a, mi 488 (0.37%) thi tawhin, enkawl mek mi 3,994 (2.99%) an awm.

November 25, Ningania Covid-19 vei hmuh thar mi 444 zingah symptom nei mi 360 an awm a, symptom nei hi hmuh chhuah zat aṭangin 81.08% an tling a; mi 84 erawh chuan symptom an nei lo. Covid-19 vei hmuh chhuah thar mi 444 zinga 101 chu Chawilung khaw mi niin, symptom nei vek an ni a, hmuh chhuah zawng zawng aṭangin 22.75% a tling. Phuaibuang khaw mi 56, symptom nei vek, Daido khaw mi 18, symptom an nei vek leh Mimbung khaw mi 12, symptom nei vekte an tel bawk.

Hripui vei hmuh chhuah thar zingah sikul leh hostel lama hmuh chhuah tarlan an awm leh a, Lungleia Bethesda Higher Secondary School-a mi pali an ni. Swab sample endik aṭanga hripui vei hmuh zat (positivity rate) 10% chung lam district paruk a awm a, a sànna ber Saitual district-ah 35.45% a tling. Positivity rate 10% chung lam district dangte chu - Champhai 25.17%, Siaha 23.08%, Serchhip 22.31%, Hnahthial 12.73% leh Khawzawl 11.59%-te a ni.

Ningania India rama Mizoram aia Covid-19 positive hmuh chhuah tamna state pali a awm a; chu'ngte chu - Kerala (mi 5,987), Maharashtra (848), West Bengal (mi 758) leh Tamil Nadu (mi 739)-te a ni. Tun November thla chhungin Mizoramah Covid-19 vei mi 12,038 hmuh chhuah a ni tawh a, chawhrualin ni tin mi mi 481.52 hmuh chhuah an awm ang a ni a, a tlahniam hret hret zel.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 25, 2021 thlenga swab sample endik tawh 14,16,536 aṭanga RT-PCR hmanga endik zat percentage chu 22.78 a ni a, RAT hmanga endik zat chu 71.31% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,33,562 chu mi 1,000 zelah hripui vei mi 122 an awm ang a ni a; mi 1,00,000 zela Covid-19 vangin mi 44 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 343 chhuahtir an ni a; Aizawl district-ah mi 130, Lunglei district-ah 69, Serchhip district-ah 49, Kolasib district-ah 23, Champhai district-ah 21, Hnahthial district-ah 18, Mamit district-ah 15, Lawngtlai district-ah 14 leh Saitual district-ah mi pali an chhuak a ni.