Mizoramah Remna Ni lawm a ni

June 30, Inrinni kha Remna Ni a ni a, India sorkar leh MNF te'n inremna thuthlung, Memorandum of Settlement (MoS) an ziah ni, Remna Ni champha vawi 32-na hi Mizoram hmun hrang hrang­ah lawm a ni. Aizawlah chuan MZP bul­tumin Pachhunga University College (PUC) Auditorium-ah hman niin, mi pathum hnenah chawimawina hlan a ni.

Aizawla Remna Ni lawmna inkhawm hi MZP vice president Vanlaltána'n a kaihruai a; khuallian, chief minister Lal Thanhawla chuan, MZP-in a huhoa Mizoram tana ni pawimawh Remna Ni a huhoa lawmna hun an siam chu lawmawm a tih thu a sawi a, "Rambuai lai chuan ni tin mipui nun hlauthawng leh thlabár takin kan awm ṭhin. Remna leh muanna hlutzia hi tunlai mite'n an hriat thar zel a pawimawh a, a vawnhim leh chhawm nun zelnaah a tua te pawh kan mawhphurhna a inchen tlang a ni," a ti.

Lal Thanhawla chuan, Mizorama remna leh muanna siam tura thawktu an tam thu sawiin, "Huaisen takin ram mipuiin nun pangngai an neih nana mahni theihna zawn ṭheuha hma an la a. Mizoram economy-in tun hnaia nasa taka hma a sawn theih chhan chu ram leh mipui mamawh ruahmannate siam a kalpui vang a ni a, hengte hi remna tel lo chuan tih theih a ni lo," a ti a; Mizoramin remna a neih hlu tak chu Pathian vang a ni tih hria a, vawng himtu ni ṭheuh tum turin mipui a ngen.

MNF president Zoramthanga pawhin thu sawiin, MNF leh India sorkar inremna chu khawvela remna hlawhtling ber leh duhawm ber a nih thu a sawi a, "He remna hi Zo fate tan a pawimawh em em a, remna avang hian state sorkar kan lo ni a, remna hi tu siam bik mah ni loin, Mizoram mipui zawng zawng lungrualna leh thawhhona vanga thleng a ni," a ti a; remnaah Mizoram neitu nihna leh a khawih chetna chungchang chu Mizo mipuite kutah a awm thu a sawi.

Pu Laldenga ṭan tlatna a nih avangin Zo fate inhumhimna atana pawimawh hrang hrang remna thuthlunga dah tel a nih thu sawiin Zoramthanga chuan, "Remna thuthlung hi a nghet a, a tlo. Remna thuthlung hi Mizote'n kan remtihna tel loa India Parliament-in a siam danglam theih a ni lo. A sign-tute thu lo chuan engmah tih danglam theih a ni lo. Kan rama muanna ang hi an duh ve a, hetiang remna nei ve tur hian palai hna thawk tura sàwm ka ni a, hei hian Zoramin remna leh muanna kan neih dan ropuizia a tichiang hle," a ti.

ZPM chief ministerial candidate Lalduhoma chuan, remna kan neih theihna atan mi pawimawh bik pahnih an awm thu sawiin, "Chu chu prime minister Indira Gandhi leh Pu Laldenga an ni. Pu Laldenga khan independent sual zel tum ta ta se remna a awm thei dawn lo. Independent hi tharuma sual chhuah rual a ni lo, mipuite pawhin kan tlin tawh lo tih hriain mipuite leh kohhran hote ngenna changin, India danpui hnuaia inbiakna nei turin a tlawm a ni," a ti a, tlawm ngamna hi huaisenna sang ber a nih thu a sawi.

Lalduhoma chuan kan remna thuthlung kan hrilhfiah dan leh sawi dan a inan loh thu sawiin, "A ṭhenin independent ram chhunga independent ang kan ti hiala an sawi laiin, a ṭhenin Mizote tlawmna ni tiin lawmtlak loh hialah an chhuah a ni. Chuvangin, kan history hi kan mithiam historian ngeite hian dik takin min ziah sak se a pawimawh a hle," a ti.

Remna Ni hmanna buatsaihtu MZP president L Ramdinliana Renthlei chuan, vai sipaite'n dimdawina tel loin kum 20 chhung Mizote an nghaisa a, khaw tam tak khaw khatah an khawm tih sawiin, "Pitar putar an dîm lo a, nunau pawisawi lo thlengin an nghaisa duh zel a, nula, nu leh pitar thlengin an pawngsual a ni. Remna hlut zia i chhût nawn ang u," a ti a, MZP-in remna a awm theih nan nasa taka beiin, MZP din zui a rem loh hnuah pawh SJAC angin remna atan an beihzui thu a sawi.

Inkhawmah hian tlawmngai pawl hrang hrang aiawhte pawhin thu an sawi a; MZP chuan Mizoramain remna a neih theihna atana thawk ṭha nia an hriat mi pathum - MNF dintu leh president Laldenga (L), MoS ziah laia Mizoram chief secretary leh inremnaa hming ziaktu Lalkhama leh, MoS ziah laia chief minister Lal Thanhawla te hnenah chawimawina an hlân.

MNF-in March 1, 1996-ah Mizoram independence puanga zalenna an sual a, kum 20 chhung Mizoram chu rambuai a nih hnuah, June 30, 1986 zanah Memorandum of Settlement ziah a ni a; Peace Accord an tih mai, MoS-ah hian MNF president Laldenga, Union Home secretary RD Pradhan leh Mizoram chief secretary Lalkhama ten hming an ziak a ni.