Pianphunga rualbanlo Lalruatsaka hnenah auto-rickshaw hlan

Kumin HSLC exam-a pass Lalruatsaka s/o Lal­rengpuia, Lunglei Lunglawn chu tun hnai khan NLUP Implementing Board (NIB) vice chairman JH Roṭhuam­a'n CM Special Package kaltlangin NLUP hnuaiah auto-rickshaw a hlân.

Auto-rickshaw hlanna inkhawm, Lunglei DC office complex-a buatsaihah JH Roṭhuama chuan, Lalruatsaka’n HSLC exam-ah hlawhtlinna a chang chu a lawmpui thu sawiin, "Thil ti thei tura inngaih tlatna rilru nghet tak a nei hi a ropui hle. Pianphunga rualbanlo ni mah se, beidawng mai loa taima taka a beih zel avangin mi entawn tlak leh chhuanawm tak a ni," a ti.

Lalruatsaka hi pian tirh aṭangin a bán a bûl a, Chief Minister chuan May 24, 2018-a Lunglei MZP-in HSLC leh HSSLC pass tharte lawmpuina an buatsaih ṭumin Lalruatsaka tumruhna chhuanawm a tih êm avangin auto-rickshaw pek a nih tur thu a lo puang tawh a ni.