KHAWTHLIR
Poetry Evening
Aijal Club leh Rokunga Memorial Society-te chuan July 29, Zirtawpni zan khan Remna Ni pualin Aijal Club-ah Poetry Evening 2018 an hmang. He hunah hian university leh college zirlai mi pa-sarih leh mi dang pakhatin hlachhammi (poetry) an phuahte kalkhawmte hmaah an chham a; hla phuah thiam T Zorampela kawmna hun hman a ni bawk.
YMA Day hmang
Tlabung Branch YMA chuan June 30, Inrinni khan an khuaa Bazar Bungkawnah YMA Day an hmang. Tlabung YMA hian YMA Day hi Khawthlangtuipui lian vangin a ní takah an hman theih loh avangin Remna Ni-ah an hmang a; an YMA hnuaia Heritage Committee-in Tlabung khaw din hun ker lanna lung, Tlabung Bazara an phun chu Tlabung V/C president Thangkhuma'n a hawng a ni.
Synod HSS re-union
Synod HSS Alumni Association chuan June 30, Inrinni khan Synod Conference Centre-ah re-union an hmang. Re-union-ah hian Synod Higher Secondary School-a lut tawh mi ṭhahnem tak an tel a, hruaitu thar an thlang nghal a ni.
CM chawimawi
Mizoram Pradesh Youth Congress Committee (MPYCC) chuan, MPCC president leh chief minister Lal Thanhawla chu Mizorama remna leh muanna thlentuah ngaiin June 30, Remna Ni khan CM Bangla-ah zahna leh chawimawina pangpar an hlân. Chawimawina pangpar hi MPYCC president Dr Lalmalsawma'n a hlan a, "Mizoram leh hnamin hruaitu ropui Pu Lal Thanhawla kan nei hi a vanneihthlak hle a ni," a ti.
MYC member
Mizoram sorkar chuan Mizoram Youth Commission (MYC) member atan Dr Tawnenga, Mission Veng; Prof. J Zorema, Lunglei Chanmari leh Lalhmachhuana, Chawnpui-te a ruat thar. MYC member tharte term hi kum thum a ni a; hriattirna hi June 29, 2018 khan tihchhuah a ni.
Puanthui zirna
Mizoram Police Wives Welfare Association, Kolasib hmalakna hnuaia Kolasib Police Station-a puanṭhui zirna hmun chu Inrinni khan hawn a ni. Puanṭhui zirnaah hian khawl pariat a awm a, ṭum khatah mi 10 tan puanṭhui zir theih tura duan a ni.