MNF hruaitute'n Remna Ni an hmanpui

MNF party chuan June 30 khan Mizorama khaw hrang hrangah Remna Ni lawmna inkhawm an buatsaih a; MNF general headquarters-a hruaitute'n hmun hrang hrangah an hmanpui.

MNF senior vice president Tawnluia chuan Thenzawla Vantawng Group YMA Hall-a Remna Ni puala inkhawm a hmanpuinaah thu sawiin, "Zoram zalenna atana sûlsutu, remna atana thawhhlawk ber Pu Lal­denga hian vawiinah hian chawimawi a phu tak zet. India sorkarin 'Peace without Laldenga' tia a tel loa remna siam a tum a, mahse, a tel loin remna a awm thei lo. Remna thuthlung chhertu leh pawimawh ber chu Pu Laldenga a ni," a ti.

Tawnluia chuan, "Kan remna hian Mizo mipui zawng zawng min huap vek a, India ram pawh a huap vek. Chu chu Indian Constitution Article 371G hian a tichiang a ni," a ti a; mi ṭhenkhatin inremna thuthlung ziah a nih avangin Laldenga chu a tláwm niin sawi mah se, an tláwm lo a, Zoram mipuite duh danin an kal zawk niin a sawi.

MNF vice president R Tlanghmingthanga chuan Saitual Auditorium-ah Saitual MZP-in Remna Ni lawmna an buatsaih a hmanpui a; thu sawiin, "Kan inrem loh em avang khan inremna ní hi lawm thei kan ni a, Remna Ni hi inrem lote tan remna ni lo ni mawlh rawh se. MNF-in zalenna a sual chhan kha hnam dangte awpbeha awm reng turin Mizote hi Pathianin min din lo a, mahni kea ding chhuak tura kan beih hi a duh dan a ni," a ti.

MNF treasurer Vanlalzawma chuan MZP headquarters, Lungleiin Art & Culture Archive Hall-a Remna Ni lawmna an buatsaih a hmanpui a; "Remna Ni hmangtu tur ber chu Mizo mipuite hi kan ni a, Mizo nula leh tlangval, ram leh hnam tana kal chhuakte kha remna kan neihna tura pên chhuak mai an ni lo a, Mizoram leh hnamin zalenna tluantling kan neih theihna tura pên chhuak an ni," tiin, Peace Accord-a ziah lan tam tak, India sorkarin a la hlen lohte chu a tihpuitlin theih nan chak lehzuala nawr a ngaih thu a sawi.