Dalmia, Star, Topcem, Best cement-te Mizoram chhungah zuar rih dawn lo

All Mizoram Cement & Iron Rod Dealer's Association (AMCIRDA) chuan thuchhuah siamin, tunlai, fûr khawchhiat lai velah monsoon discount neia cement rate a tlakhniam an beisei laiin, cement company ṭhenkhat Dalmia, Star, Topcem leh Best Cement-te'n an rate Rs. 15-in an tisang niin an tarlang a; hei vang hian cement titotu company-te cement an zuar rih dawn loh tih an puang.

AMCIRDA chuan, cement company-te'n cement rate an tihto chhan chu an pawmpui lo tih sawiin, "Kan ṭhenawm state Assam, Tripura, Meghalaya-ah pawh tito lo a, Mizoramah chauh rate an tito hian min rawkah kan ngai tlat a ni. Mizo mipui min hmuhsitnaah kan ngai," an ti.

AMCIRDA hian Dalmia, Star, Topcem leh Best Cement-te chu July 3, Thawhlehni tlai dar 5 ral hmaa rate an tihsanna an hnûk hniam lo a nih chuan an cement siam chhuahte an zuar rih dawn lo a, Mizorama a luh loh nan hma an la nghal dawn a ni. An ngenna vanga rate tisang ve lo - Valley Strong, Max, Black Tiger, Taj leh Amrit Cement-te erawh chu an zuar reng dawn tih an tarlang.