Khawzawl RD Block-ah BPL an tlem ber BPL tamna ber Bungtlang South Block

Mizorama Rural Develop­ment (RD) block 27 zingah block chhunga chhungkaw awm zat aṭanga chhûtin, Lawngtlai district-a Bungtlang South RD Block-ah mirethei zual, below poverty line (BPL) chhungkua an tam ber a; Champhai district-a Khawzawl RD Block-ah BPL chhungkua an tlem ber thung.

Economics & Statistics department-in tun hnaia an tlangzarh tâk, BPL Baseline Survey 2016 report-a a lan danin, Bungtlang South RD Block-ah hian khua 30 a awm a; khaw 30-ah chuan chhungkua 3,970 awmin, chu'ng zinga chhungkua 2,705 (68.14%) chu BPL chhungkua an ni.

BPL tamna ber dawttu chu Siaha district-a Tipa (Tuipang) RD Block a ni a, block chhungah khaw 47 awmin, chhungkua 5,045 an awm a, chu'ng zinga chhungkua 2,532 (50.19%) chu BPL chhungkua an ni. A pathumna chu khaw 20 awmna West Phaileng RD Block niin, chhungkua 5,077 an awm a, chu'ng zinga chhungkua 2,393 (47.13%) chu BPL chhungkuaa ziah luh an ni.

Hetih lai hian, BPL chhungkua tlemna ber Champhai district chhunga RD Block pathum chu BPL tlemna RB block panga zingah an tel a; chu'ngte chu - Khawzawl Block, Champhai Block leh Ngopa Block-te a ni.

Block chhunga chhungkaw awm zat aṭanga teha BPL chhung­kua tlemna ber chu Khaw­zawl RB Block a ni a; Khawzawl Block-ah hian khua 29 awmin, chhungkua 7,671 an awm a, chu'ng zingah chuan BPL chhungkua 386 (5.06%) chiah an awm.

RD Block zinga BPL tlemna ber dawttu chu Champhai Block a ni a, khua/veng 33-ah chhungkua 11,753 awmin, chu'ng zinga 937 (7.97%) chiah chu BPL an ni a; BPL tlem lama pathumna - Tlangnuam Block (Urban)-ah khua 12 an awm a, chhungkua 67,023 awmin, chu'ng zinga 7,940 (11.84%) chu BPL chhungkua an ni.