Salvation Army-in Founder's Day an lawm
Salvation Army chuan nimin khan Salvation Army dintu, William Booth-a pian champha, a kum 153 tlinna, Founders Day khawvel pumah an lawm a, Mizoramah pawh India Eastern Territory chhunga corps leh society-te'n kawng hrang hrangin an lawm.
William Booth-a kum 153-na pual hian Aizawl Temple Corps chuan Old Age Home leh Adult Rehabilitation Centre-ah ṭanpuina Rs. 5,000 ve ve an hlan a, Home League-te'n Motherless Babies Home-ah thilpek an hlan bakah, Salvation Army Youth-te'n Temple kawtah zing dar 10 aṭanga tlai dar 3 thleng a duh apiang tan theitui leh chhang an sem a, a thlawna blood pressure enna an hawng bawk.
Temple Corps Mens Fellowship leh Prayer Ministry bultumin counselling mamawh tan hun an hawng a, counsellor pathum ṭhuin, mi 30 chuang counselling pek an ni.
Dawrpuia Bazar Corps Cadet-te chuan Founder's Day pual hian Millennium Centre kawtah a thlawin theitui leh chhang an sem a, home hrang hrangah thilpek an hlan bawk.