HSS pakuaa zirlaite ni 11 sikul kal lo tawh

Mizoram Govt. Lump­sum Grant-in-Aid Higher Secondary School Association (MIGLAHSSA) chuan June 18, 2018 aṭanga tiam chin awm loa sikul an khâr chu an la chhunzawm zel a; lump­sum aided higher secon­dary school pakuaa zirlai 850 vel chu ni 11 chhung sikul an kal tawh lo.

MIGLAHSSA general secretary R Lalfakawma chuan Vanglaini palai zawh­na chhangin, lump­sum grant-in-aid HSS pakuain adhoc grant-in-aid dinhmuna hlânkai an phût leh chumi vanga sikul an khâr kaih­hnawihah sorkar aṭangin thu lawmawm an la dawng lo a, sorkar hotute nen an la indawr lo tih a sawi.

MIGLAHSSA-ah hian lumpsum grant-in-aid HSS pakua - Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thing­sulthliah HSS, Zo­bawk HSS, West Phai­leng HSS leh Zawl­nuam HSS-te an tel a; heng HSS pakuaa zirlai 850 vel chuan ni 11 chhung zirna an chhun­zawm thei lo tawh a ni.

Lumpsum aided HSS pakuaa zirlaite hian sikul kala zirna chhunzawm an duh tawhzia leh Mizoram sorkarin an zirtirtute leh an sikul managing board-te ngenna chu tihlawhtling se an duhzia an lantir tawh ṭhin. Sikul khâr hma hian MIGLAHSSA hian Demand Day an lo hmang tawh bawk.