Zu zawrh kan titâwp phawt ang - ZPM Lunglei East-a ZPM candidate tur Lalrinpuii?

Zoram Peoples' Movement (ZPM) secretary general K Sapdanga chuan, ZPM-in sorkarna an chang a nih chuan, Mizorama zu zawrh mek chu an tihtawp phawt dawn thu a sawi. Tun hnaia ZPM zawm thar, Lalrinpuii, Lunglei Chanmari chuan, kumina Assembly inthlanah Lunglei East bialah ZPM candidate ni tura a inbuatsaih thu a sawi bawk.

ZPM hruaitute chuan Lalrinpuii pualin nimin khan Aizawl Press Club-ah thuthar thehdarhtute an kâwm a; zawhna chhangin K Sapdanga chuan, khuahkhirh loa zu zawrh chu a ṭha an ti lo tih a sawi a, "Kan sorkar a nih chuan zu zawrh hi kan titawp phawt ang. Tuna sorkar pawh hian an term tawp hma hian heti taka nunna heh zu zawrh hi titawp phawt turin kan ngen a ni," a ti.

K Sapdanga chuan, hmasawnna reng reng ram leh hnam tan a him em, tih ngaihtuah hmasak zel a ngaih thu sawiin, "Eng anga hmasawnna ropui pawh ni se, hnam leh ram a him loh chuan kan duh lo," a ti a; ram leh hnam himna an dah pawimawh hmasak thu a sawi.

ZPM-in an sorkar huna sawhthing kg. khat Rs. 50-a lei an tum thu an puan tawh chungchangah ZPM Secretary General chuan, "Kan sorkar chuan kan ti ngei ang," a ti. Tun hnaiah social media-ah ZPM a sorkar chuan Chakma leh Bru-te hrêk an tum anga thu thehdarh a awm chungchangah, "Hei hi thu dik lo a ni a, Chakma leh Bru chungchang hi ZPM-in a la rel ngai lo hrim hrim a ni," a ti bawk.

Lunglei East biala ZPM candidate tura ngaih Lalrinpuii chuan, public leader-te'n Mizo mipui rilru an tichhe nasa tih sawiin, "Hemi siamṭha tur chuan public leader ṭha neih a ngai," a ti a; ZPM-in hruaitu an neih ṭhat avang leh Mizoram siamṭhat an tum dante chu ṭha a tih avang te, chief ministerial candidate Lalduhoma chu ṭha a tih vang te, ZPM-in kalpui an tum six basic needs-te chu Mizoram mamawh a la nih reng avangte leh kalphung tur an sawi hrang hrangte chu ṭha a tih avangin ZPM a zawm ta tih a sawi.

Bangalore-a college-a thawk ṭhin Lalrinpuii chuan, Mizoram zirna a vei thu sawiin, "Zirnaah ti ṭha tur chuan a bulṭhut, primary school aṭanga zirna ṭha neih a ngai. RTI Act hmanga information ka dawn aṭanga ka hmuhchhuah chu, thingtlang leh hmun kilkhawr deuha zirlai 30-100 awm­naah zirtirtu pahnih/pakhat leh awmna a tam hle mai a, hei hi thing­tlang mite hmuhsitna lian tak a ni," a ti.

Mizo politician zinga 90% vel chu eizawn nana politics hmang nia sawi ṭhin a nih thu leh chu chu amah pawhin a pawm dan a nih thu sawiin, "Kei chuan politics hi eizawn nan hman ka tum lo," a ti a; Mizoram sorkar leh kalphung chu Mizo mipui 70% velin thlak an duh tawh nia a lan thu a sawi.

Lalrinpuii hi Bangalore Mizo Asso­ciation president ṭhin a ni a, Bangalore-a an awm chhungin college-ah public relations officer hna a thawk ṭhin. An college chu ICCR leh EDCIL-in an pawm (empaneled) a nih avangin college aiawhin India ram hmun hrang hrang leh India ram páwnahte college aiawhin a zin chhuak ṭhin a ni. ZPM sawmna angin ZPM a zawm a, hei vang hian a hna aṭang pawhina a báng tawh a; Lungleia ZPM Women's Committee-ah chairperson-in a awm dawn a ni.

Press conference-a Lalrinpuii ṭawi­awmtu Rev.Dr K Thanzauva, ZPM vice chairman chuan zawhna chhangin, kumina inthlan awm turah Lunglei South bialah ZPM candidate a nih theih thu a sawi a, "Kan ram siamṭha turin tun hi hun remchang a ni a, change i siam ang u," tiin mipui a sáwm a ni.