KHAWTHLIR

Exhibition hawng
North Eastern Regional Agricultural Marketing Corporation (NERAMAC), North East Foundation (NEF) leh Commerce & Industries department-te chuan nimin khan Assembly House Annexe-ah ‘North East India-Myanmar Reverse EXIM Conclave Exhibition’ an buatsaih a, Commerce & Industries minister H Rohluna'n a hawng. Exhibition-ah hian stall 19 a awm a, India hmarchhak state hrang hrangte kutchhuak pho chhuah a ni.

E. Roll sawiho
Special Electoral Roll Summary Revision chungchang ngaihtuahin nimin khan Aizawl DC Dr A Muthamma hoin DC conference hall-ah political party aiawhte an ṭhukhawm. Aizawl Bawrhsap chuan, political party-te chu electoral roll ennawnna chu dik leh felfai neih a nih theih nan theihtawp chhuah turin a sáwm a ni.

MZP an lawm
MZP chuan nimin khan thuchhuah siamin, June 28-29, 2018 chhunga Mizoram Legislative Assembly session-ah The Citizenship (Amendment) Bill, 2106 duh lohna resolution pass a ni chu lawmawm an tih thu an tarlang a, "Mizoram MLA-te chungah thinlung takin lawmthu kan sawi a ni... MZP chuan The Citizenship (Amendment) Bill, 2016 hi Parliament-ah pass a nih loh nan hmaa lak chhunzawm zel dawn a ni," an ti.

Thiin chhar
June 29 aṭanga chin hriat loa bo Khawlthangi (88), Hmunhmelṭha khua chu nimin zing khan thiin chhar a ni. Khawlthangi hi Champhai Sub. Hqrs. YMA bultumin zawn a ni a, nimin zing khan Khankawn aṭanga PWD kawng Thlangtlak ram, Chhungte khaw zawn, kawngthlang ft. 100 velah thing tuluang chungah thi a hmuh a ni.

Chaw nghei titawp
Mizoram Underground Returnees Association (MURA) chuan June 6, 2018 aṭanga Congress party nen an thuthlung tihpuitlin phûta chaw an nghei chu June 30, 2018-ah an titawp tih an puang a; chaw nghei an tihtawp chhan chu, Central YMA palaina leh hriatpuinaa inremna lailawk an neih vang a nih thu an sawi.