Mizoram Agriculture Produce (Prohibition) Order, 1994 kan ṭhiat ang - Lalduhoma

Zoram People's Movement (ZPM) chief ministerial candidate Lalduhoma chuan, ZPM an sorkar chuan Congress sorkar hmasak laia siam Mizoram Agriculture Produce (Prohibition) Order, 1994 chu an ṭhiah dawn thu a sawi.

Nimina ZPM pisaa inkhawm­ah thu sawiin Lalduhoma chuan, kum 1994 khan Congress sorkarin Mizoram Agriculture Produce (Prohibition) Order, 1994 a duang tih a sawi a, "Kan ram chhunga thlai tharte ram páwna hralh chhuah khapna dan an lo siam a, he dan hnuaiah hian kut hnathawktute thlai thar chu an thunun a ni," a ti.

Mizoram Agriculture Pro­duce (Prohibition) Order, 1994 siamtu Congress sorkar laiin Silchar-a mi Sundar Ali nen inthurualin man tláwm tê têin Mizorama kut hnathawktute thar chhuah an leisak nia sawiin Duhoma chuan, "A hnuah MNF an sorkar leh a, a zual zawpui vaihlenhlo tih ang maiin, kut hnathawktute thar chhuah zinga item 138 lai chu an rawn control leh a ni. Kut hnathawktute thawh rahte hi ram páwnah zalen taka an hralh chhuah theih nan ZPM kan sorkar chuan kan ṭhiah hmasak ber turte zinga mi a ni," tiin a sawi.

Lalduhoma chuan, Samthang khuaah tunlaiin zîkhlûm an thar nasa tih sawiin, "A hralh chhuahna lamah phai lam aṭanga zîkhlûm a lo luh ve reng avangin harsatna an tâwk a, Aizawl bazara khârchhâwng hote'n mahni ram chhunga mi ngei mipuiin an lei theih nan phai lam aṭanga zîkhlûm lo lutte lei lo turin July 2, 2018 aṭangin bazarah an thu dawn lo a ni," a ti a; chutianga an hmalakna chu ZPM-in ropui an tih thu a sawi.

ZPM CM Candidate chuan, 18th. Power Survey of India-a a lan danin, Mizoramah kawlphetha megaqatt 3,663 siam chhuah theihna a awm tih sawiin, "Kan rama power enkawltu P&E department hi kum 1979-ah din a ni a, kum 40 vel zeta upa tawhin tuna min thlenpui theih chu megawatt 10 thar chhuah chauh hi a la ni," a ti.

Lalduhoma sawi danin, tuna Mizorama kawlphetha siam chhuah anga sawi megawatt 29.35 chu installed capacity niin, megawatt 15 chu genarated a ni a, chuta ṭanga a taka siam chhuah chu megawatt 10 a ni. Duhoma chuan, "Kan siam chhuah theih zawng zawng aṭanga chhût chuan a taka kan siam chhuah hi 0.27% chauh a ni," a ti a; tun dinhmunah Mizorama chhungkaw nuai 2 velin electric connection an nei a, connection la nei lo chhungkua 12,625 an la awm tih a sawi.

Lalduhoma chuan, Mizorama hydel project pakua - Tuila, Lau, Tuisumpui, Tuidum, Laililui, Vawra lui, Ramri lui, Leiva leh Bairabi thermal project-te chu hluihlâwn tawh a ni a, a taka hman theih chu ni se megawatt 2,411 siam chhuah theihna a nih thu a sawi a, "Power lei nan Mizoram sorkar budget a kal ral hnem a, tuikhuah ṭha tak siamna tham a liam tawh a ni," a ti.