Siaha-ah POSCO Month hawng

Siaha District Child Protection Unit bultumin nimin khan Siaha DRDA conference hall-ah ‘Protection of Children from Sexual Offences (POCSO) Month’ hawnna inkhawm buatsaih a ni a, Siaha bawrhsap Harleen Kaur-i'n a hmanpui.

Hawnna inkhawm hi Siaha DCPO Dr David Zaitinvawra'n a kaihruai a; Siaha DC chuan, naupangte hursualna laka an him theihna tur leh vanduaina tâwkte’n huaisen taka an beih let theihna tura mi tin hnena zirtirna hun ṭha hman theih a ni chu lawmawm a tih thu a sawi a, "Nu leh pate'n kan tu leh fate hnena kan zirtir dan ṭhinte thlak a hun tawh hle. Naupangte hriat thiang loha kan ngaihna lai hi a pawina lai a ni," a ti.

Harleen Kaur chuan, Siaha district-a POCSO Act hman ṭan a nih aṭanga nimin thleng khan naupang pawngsual leh khuaikhemna thubuai 35 a awm tawh thu sawiin, "Report loh eng emaw zat a awm ngeiin a rinawm. Heng pawikhawihtute hi naupang hmelhriat ṭha leh an chhung hnaite an ni duh hle a ni," a ti a; naupangte khawi hmunah pawh an him lo niin a sawi.

Inkhawmah hian Siaha chief judicial magistrate Lalramsanga'n POSCO Act, 2012 a sawifiah a; hawnna inkhawm zawhah Kolodyne Royals (Siaha Bullet Club)-te'n Siaha khawpui chhung bakah Amobyu Vaihthie (Zero Point) thleng rally an nei a ni.