Thenzawl VT leh YMA bultumin Thenzawl kawng thawm ṭhat a ni

Thenzawl Vengthar V/C leh YMA-te chuan nimin khan an huam chhunga kawngpui chhe zual laite hnatlangin an thawm ṭha. Nimin vek khan Salvation Army, Thenzawl Bazar Corps chuan Salvation Army dintu William Booth pian champha pualin Lau lui leh a kam thenfai hnatlang an nei bawk.

Vantawng chanchinbu editor Liantluanga Renthlei hnen aṭanga thu dawn danin, Thenzawl Vengthar V/C leh YMA-in kawng siam hnatlang an kohah hian mi 70 an thawh chhuak a; an veng chhunga kawngpui pawimawh - Horticture College, Police Training School, JNV School leh M/S Grace Indane kudam panna kawng khuar chhe zual lai leh a diak laite an thawm ṭha a ni.

Thenzawla Salvation Army-te chuan nimin vêka faina beihpuithlak hnatlang an neihah hian mi ṭhahnem tak an thawk chhuak a; Thenzawl hual chhuaka lui luang, Lau lui leh a kam vela bawlhhlawhte an thian fai a, Thenzawl Joint YMA Hall leh a velte an tifai bawk.