Mualṭhuamah fimkhur turin ngen

Mualṭhuam North khelmual chu a khi a, a thlang lam minin a thlanga Aizawl-Lunglei World Bank Road a hnawh bawk. Khelmual hi min leh mai thei a ni a, a min leh a nih chuan a thlanga kawngpui a hnawh leh dawn avangin, Mualṭhuam North V/C chuan zin veivâkte fimkhur turin an ngen a, LMV chin hnuai lam chu khaw chhung kawnga tlân turin an ngen.

Mualṭhuam North V/C president PC Chhawnkima sawi danin, Mualṭhuam North khelmual tlahniam hi June 12, 2018-ah hmuh a ni a, chumi hnuah bialtu MLA PC Lalthanliana hmalaknain a min zel tur ven nan silpauline-a an khuh a ni. Khelmual sir thlang lam min hian Aizawl-Lunglei World Bank road pawh a lo dang tawh a ni. Hetih lai hian, lei khî huam chhungah hian chenna in a awm lo niin an sawi.