Larsapin MZU Incubation Centre a hawng

Mizoram Univer­sity (MZU)-a Incuba­tion Centre din thar chu nimin khan Gover­nor Kummanam Raja­sekharan-a'n a hawng. Centre hi Directorate of Science and Technology, Government of India aṭanga sum hmuh cheng vbc. 10.45 sênga din a ni.

Governor chuan, MZU chu Mizoram chhuanvawr a nih thu sawiin, "India chhuanvawr pawh a la nih thuai ang. Incubation Centre hi Mizoram bakah ṭhenawm ramte tana thil ṭangkai a la ni ang. India hmalam hun chu mahni kutkawiha eizawngte (entrepreneurs) kuta thui tak a innghat a, vawiina an inpuahchah dan hian kan ram hmalam hun tur thui tak a hril a ni," a ti.

Tunlai khawvel, inel­na sang tak karah ṭhalaite tan hun ṭha khawhral tur emaw, awm hahdamna hun emaw a awm lo tih sawiin Larsap chuan, "Education lamah tun aia nasa zawka hma kan sawn a ngai. Mahni kutkawiha dingchhuak tur chuan ngaihtuahna danglam neih a ngai a ni," a ti a; MZU Incubation Centre chu eizawnna bul ṭanna remchang, ram ei bar dinhmun chawikangtu a nih a beisei thu a sawi.

MZU vice chancellor Prof. KRS Sambasiva Rao pawhin thu sawiin, "University tana ni chhin­chhiah tlak a ni. Incubation Centre hian mi fing leh ngaihtuahna danglam neite tan remchanna a siamsak ngei ang. Mahni zirlai piah lama hetiang thila ngaihtuahna séng peihte tan Incubation Centre hi a inhawng reng a, ram hma­sawnna atan pawh a ṭangkai dawn a ni," a ti.

Incubation Centre coordinator Dr Laldin­liana Varte chuan, Incu­bation Centre din a nih aṭanga nimin thlenga an hlawhtlinna te, an hnathawh dan te, service an pek theihte leh an thawhpuite chungchang a sawifiah a ni.

MZU Incubation Centre hi sq. ft. 20,000 a zau niin, 3D room leh fab­rication/ prototype lab-te a awm nghal a ni.