Faina lama hmalak dan tur sawiho

Aizawl District Sanitation Implemen­tation Committee chu Thawhṭanni khan Aizawl bawrhsap Dr A Muthamma hoin DC conference hall-ah an ṭhukhawm a, faina lama hmalak dan tur an sawiho.

Dr A Muthamma chuan, Aizawl district faina kawnga hma a sawn lehzual theihna atan cheng nuai 27.80 dah hran a nih thu a sawi a, "Hei hi NEDP hnuaia UDPA department component pakhat a ni a, Aizawl DC kaihruaina hnuaia kenkawh tur a ni. Hmalakna tur hrang hrang a awm a, chu'ngte chu Aizawl district-a tui luankawr leh lui thenfai leh chei ṭhat te, faina chungchang zirtirna veng hrang hranga phochhuah te, mipuite'n faina lama hmalam kan pan theih nana zirtirna leh inhrilhhriatna neihte leh vantlang faina atana beihpui thlakte a ni," a ti.

Meeting-ah hian Aizawl district chhunga tuihâwk luankawr leh veng ṭhenkhat tihfai ngai zual thlan chhuah a ṭul thu te, tui luankawrte chu tihfai bakah, chei ṭhat thlenga hmalak a ngaih thute sawi a ni a; department hrang hrang, Aizawl Municipal Corporation leh NGO tih tur ṭheuh siam rem a ni.

Meeting-ah hian Aizawl DC pisa-a hotu te, AMC, PHE, IPR, DLAO, SDO (Civil) Saitual, UDPA department leh MUP aiawhte an tel.