Kumin 2018 chhungin Thenzawl khuaah Scrub typhus vei mi 28 hmuchhuak tawh

Thenzawlah rannung seh natna, scrub typhus a hluar mek a; kumin 2018 chhungin scrub typhus vei mi 28 hmuh chhuah tawh niin, chu'ng zinga 23 chu kar kal ta chhunga hmuh chhuah an ni. He natna vang hian Thenzawlah hian kuminah mi pahnih an thi tawh.

Thenzawla Vantawng chanchin­bu editor Liantluanga Renthlei hnen aṭanga thu dawn danin, Thenzawl Kanan Venga mi, Ramluahtlingi (53) w/o H Vanlalzuala chu July 2, Thawhṭanni tlai khan State Referal Hospital-ah rannung seh natna vangin a thi a, ani hi rannung seh natna vanga kumina Thenzawla mi thi pahnihna a ni. Thenzawlah hian May 11 khan hmeichhe naupang kum 7 mi a lo thi tawh bawk.

Thenzawl damdawi-in (community health centre)-a medical officer Dr Remlalnghaki'n zawhna chhanga a sawi danin, Thenzawlah hian rannung seh natna hi kum 2015 aṭang hriat leh chhinchhiah ṭan a ni a, chuta ṭanga tun thlengin scrub typhus vei mi 36 hmuh chhuah a ni tawh.

Kum 2018 chhung bikah chuan Thenzawlah hian scrub typhus vei mi 28 hmuh chhuah tawh niin, an zinga mi 23 zet chu kar kal ta, June thla chawlhkar hnuhnung ber aṭanga nimin thlenga hmuhchhuah an ni a; niminah pawh mi pathum hmuhchhuah leh a ni.

Thenzawlah hian kuminah scrub typhus hmuh a nih fo avangin Health Sevices department-a Integrated Diseases Surveillance Programme (IDSP) team chuan IDSP state nodal officer Dr Pachuau Lalmalsawma hoin May 23-24, 2018 chhung khan Thenzawlah kalin, rannung seh natna dinhmun an zir chiang a ni.

IDSP team-in Thenzawl an tlawh ṭum hian scrub typhus vanga thi chhungte an kawm bakah, an in leh a velte an enfiah a; Thenzawl Joint YMA Hall-ah khawtlang hruaitute ko khawmin, rannung seh natna thlentu, natna lan chhuah dan, inven dan leh a veite enkawl dante an zirtir bawk.

Dr Pachuau Lalmalsawma chuan, scrub typhus thlen thei tuhrik te, a pu darhtu rannung, sazu leh thil dangte chu mihring chenna velah an ngampat lohna turin in leh a velte vawnfai a pawimawh thu a sawi a, "Khawsik reng reng ngaih­thah lo a, a chhan zawng chhuak tura mithiam pan vat a him ber a ni," tiih a lo sawi tawh a ni.