Hnam dang tipper register tawh lo turin MTA-in Mizorama DTO tinte an ngen

Mizoram Tipper Association (MTA) chuan, Mizorama hnam dang tipper, dan loa Mizoram sorkara register-te chu a rang thei ang bera titawp (cancel) tur leh, state páwn mite tipper chu register tawh lo turin District Transport Officer (DTO)-te an phût.

MTA hruaitute hian nimin khan Aizawl Press Club-ah thuthar thehdarhtute kâwmin, an thil duh leh phûtte an puang. MTA secretary C Laltlanmawia chuan, Aizawl DTO-ah hnam dang tipper, dan loa register 18-te chu cancel turin Aizawl DTO an ngen tih sawiin, "Cancel a nih ngei kan beisei. Kolasib-a hnam dang tipper register 21 pawh an register dawna lehkha pawimawh an thehluhte RTI Act hmangin Kolasib DTO-ah kan dil mek a, min pek ngei kan beisei," a ti.

MTA-te hian hnam dang tipper-te Mizoram chhunga service ve tawh lo tura an tih chhan sawiin C Laltlanmawia chuan, "Kan ram chhunga hnam dang tipper dan loa register-te hi kan duh lo. Hnam dang tipper registration dik lote hi DTO-in a rang thei angin cancel rawh se," a ti a; state pawn mite tipper chu Mizoram DTO-ah register ni tawh lo se an duh thu a sawi.

MTA president C Lalzarmawia chuan, an lo ruahman lawk angin July 1, 2018 aṭang khan Mizoram chhungah hnam dang tipper-te an service tawh loh nan hma an la tih a sawi a; chutih laiin, National Highway dang anga thuthang a awm pawi an tih thu sawiin, "NH kan dang lo a, hnam dang tipper, Mizorama register-te chauh tlan lo turin kan hriattir a ni," a ti.

Lalzarmawia sawi danin, an hmalakna avangin Mizorama hnam dang tipper service neitute chu an state lamah an haw vek a ni. An hmalakna avangin Lailapur-a balu mahalder Raju Laskar, Star brick neitu ni bawk leh a thurualpui Harun Rashid (Chaltlang Lily Veng), Zia Uddin (Saikhamakawn), Tahir Ahmed (Bawngkawn Durtlang Road) leh, Kabir Uddin (Bawngkawn Lunglei Road)-te chuan Lailapur leh Bagha mipui fuihpawrhin, July 2 khan Mizorama lirthei lut tur an dang a; mahse, nimin lamah chuan an dang tawh lo.

C Lalzarmawia chuan, Raju Laskar leh a thurualpuite thil tih dan chu an dem thu sawiin, "Keini chuan Mizoram chhunga construction company hrang hrang hna thawkte leh bungraw phur truck-te chu zalen taka an tlan hi kan duh dan a ni," a ti a; Raju Laskar chuan vawi tam tak Mizote harsatna a siamsak tawh niin a sawi.

MTA President sawi danin, kum 2012 - 2013 velah Raju Laskar-a malakna avangin Lailapur-ah weighbridge siam a ni a, Mizo truck-te chu pawisa an chawitir ṭhin. Kum 2014-ah pawh Raju Laskar-a hmalakna vangin Mizo driver paruk chu Donchhora Latun Bazar bula balu an hláng lai Assam police-te'n an man a, Hailakandi jail-ah ni thum) leh zan thum an tàn phah tawh bawk.

C Lalzarmawia chuan, Bagha leh Lailapur mite'n an duh hun hunah balu an tito tih sawiin, chutiang chu a nih zel loh nan hma an lak thu a sawi a; Mizorama balute chu in sak nan a ṭha tâwk tih sawiin, "Railways pawhin an test vek hnuah Mizorama balute a ṭha zawk tiin an hmang a, Bagha balu chu an hmang duh lo," a ti.

MTA hruaitute chuan, in sa lai leh in sa leh turte chu an bungraw leite chîk ṭhin tur te, balu an leiin teh ṭhin tur te, leirawhchan an lei pawhin a kim ngei em tih finfiah zel tur te, iron bod pawh a bûk a tling ngei em tih ṭinfiah ṭhin tur te, in sakna bungrua lei chungchangah vai mistirite kuta dah mai lo turtein an chah a ni.