NEDP-NLUP kalpui dan tur sawiho

Nimin khan NLUP Imple­menting Board (NIB) confe­rence hall-ah NEDP-NLUP Convergence Scheme Phase-II (2017-18) kalpui dan tur NIB vice chairman PL Thanga kaihhruainain sawiho a ni.

Meeting-a tarlan danin, NEDP-NLUP Convergence Scheme Phase-II atan hian NLUP cluster 40-a beneficiary 16,400 thlan a ni a; line department tin hnenah beneficiary-te hming, sum dawn tur zat leh ṭul dangte pek a ni.

NEDP-NLUP Convergence Scheme guideline siam tawh sa dungzuiin kalpui tur a ni a; trade ṭhenkhat ennawn ngai awmte erawh chu a changtu line department-te'n endik a, siam ṭhat tura rawtna July 4, 2018-ah peih vek tura tih a ni.

NLUP beneficiary ṭhenkhat, bank account number leh anmahni biakpawh theihna tur telephone number thehlut lo tlem an awm. NLUP atana ṭanpuina pawisa sem chhuah nghal tura rel a nih angin, bank account number leh telephone number la pe lote chu pe nghal tura hriattir an ni ang.

A tlangpuiin, beneficiary tinte chu Rs. 1,00,000 ṭheuh pek tur a ni a, first instalment-ah 50%v el pek tura ruahman a ni. Auto-rickshaw man erawh chu Rs. 1,00,000 chuang a nih avangin, auto-rickshaw trade thlangtute chu Rs. 1,00,000 baka a la daih lohna ang thawh ve tura an inhuamna leh ruahmanna Transport Director hnena hriattir tura tih an ni.

1st Installment atana sum mamawh cheng vbc. 82 chu Line department-te account a lut turin ruahmanna peihfel a ni tawh. Bank in a huam phak chin khuaa mi beneficiary-te hnenah NLUP kalphung pangngai angin anmahni bank account kaltlang a ṭanpuina sum hi pek tur an ni.

NIB thuchhuak angin in district tin a DC hnenah District Level Bankers Committee Meeting koa, bankers leh Line department hotute nen ṭhukhawmin bank-in a huam phak loh khuate tihchian a, heng khua a beneficiary-te sum fai a pawisa pek dan tur ruahmanna an siam ang. Hemi chungchangah hian DC tin hnenah instruction pek a ni tawh.

NLUP lo kalpui tawh dan angin beneficiary zawng zawngten an sum dawn dik taka hmang tura thutiamna (undertaking) siam a ngai a, hnathawh dan tur work order leh sanction order a in ziak anga ti lo beneficiary ten 2nd installment an dawng thei dawn lo a ni.