NEC-ah Mizoramin MBBS seat 82 a chang

Mizoram chuan North Eastern Council (NEC) hnuaiah Bachelor of Medicine, Bachelor of Surgery (MBBS) zirna seat 82 a chang a, central pool hnuai­a MBBS seat chan zat tur erawh hriat a la ni lo.

Thu dawn danin, damdawi lam zirna hrim hrimah Mizoramin NEC aṭangin 90 a chang a; chu'ngte chu - MBBS seat 82, Bachelor of Dental Surgery (BDS) seat pasarih leh Bachelor of Audiology and Speech Language Pathology (BASLP) pakhat a ni.

NEC aṭanga Mizoramin MBBS seat 82 a hmuh zinga seat 70 chu Mizoram Institute of Medical Education and Research (MIMER)-ah a ni a; Manipur-a Regional Institute of Medical Science-ah seat pasarih, Tripura-a Agartala Government Mediacl College-ah seat pahnih leh Shillong-a NEIGRIHMS-ah seat pathum hmuh a ni.

Mizoramin NEC aṭanga BDS seat hmuhte chu - Manipur-a Regional Institute of Medical Science (RIMS)-ah seat pali leh Guwahati-a Regional Dental College-ah seat pathum a ni. BASLP seat hi kum dangah chuan Mizoramin a hmu ngai lo.

Central pool-a Mizoram seat chan tur hi tun din­hmunah eng zat nge hriat theih a la ni lo a, August 2018-ah chuan hriat theih beisei a ni.

Mizoramah medical college, MIMER-ah kum­in aṭangin bul ṭan ni dawn mah se, kum danga Mizoramin Central pool-a seat a hmuh ṭhin ang chu a tla­hniam lutuk lo tura an beisei thu Higher & Technical Education department hotute chuan an sawi a, "Seat sem dan chu sorkar laipui thuneihna a nih avang­in thil awm dan tur sawi lâwk theih a ni lo," an ti.

Mizoram hian nikum khan Central pool aṭang­in MBBS-ah seat 17 leh NEC aṭangin seat 13, a vaiin seat 30 a chang a; BDS-ah chuan Central pool aṭangin seat pariat leh NEC aṭangin seat pasarih, a vaiin seat 15 a chang a ni.