Tlabungin July 7 thleng Airtel hun an pe

Tlabunga mobile communication leh internet ṭha lo vanga mipuiin harsatna an tawh ṭhin chungchang leh harsatna sutkian dan tur sawihoin nimin khan Tlabung khawtlang hruaitute Tlabung YMA Rúnah an thukhawm a; July 7, 2018 ral hmaa Airtel-in Tlabungah 4G an pe lo a nih chuan tiamchin awm loa Airtel tower khâr an rêl.

Tlabunga V/C leh tlawmngai pawl hrang hrang hruaitute chuan, Tlabungah mobile network a mumal loh avang leh internet a chhiat reng avangin mipuiin harsatna tam tak an tâwk nia sawiin, "Mi tam tak eizawnna thlengin a nghawng a ni," an ti a; mipuiin thla tam tak daih tur prepaid recharge pack an thun ṭhin laiin, network mumal loh vangin an hmang thei lo fo a, a thlàwnin sum an séng nasa hle niin an sawi.

Mobile phone leh internet network ṭha zawk a awm theih nan signal pe chhuaktu company hotute an dàwr ṭhin a, mahse, hmasawnna an hmu thei lo niin khawtlang hruaitute chuan an sawi a; an hmalaknain awmzia a neih theihna turin kawng dang thlan tur an nei lo nia sawiin, "An tower khàrsaka an kháwl tihtâwp vek bak hmalak ngaihna dang kan hre tawh lo," an ti.

Tlabunga pawl hrang hrang hruaitu kalkhawmte chuan thuchhuah inṭâwm siamin, Airtel thuneitute chu Tlabunga 4G pe chhuak turin July 7 thleng hun an pe tih an tarlang a; July 7 ral hnuah an thil phût a hlawhtlin loh chuan, tiamchin awm loa Airtel tower khâr an tum thu an puang a ni.