Zoram mamawh remna leh muanna - R Lalzirliana

Home minister R Lalzirliana chuan, Mizoram mamawh chu remna leh muanna a nih thu leh, Zo hnahthlak hnam peng hrang hrang zingah ṭawng inan loh vanga inenhranna a awm tur a nih loh thu a sawi.

Mizoram Pradesh Youth Congress Committee (MPYCC) chuan nimin khan CTI, Sesawngah martar lung an phun champha vawi 21-na an lawm a, Home minister leh Congress party vice president R Lalzirliana'n hmanpuiin, Martarte Thlanmualah pangpar a dah a ni.

R Lalzirliana chuan, Mizoramin remna leh muanna a mamawh thu sawiin, "Chu chu kan hotuten hriain hmanni lawkah HPC(D)-te remna an siampui a. An tê emaw, lian emaw an ngaihtuah lo, thil ṭha turah chuan inphah hniam an hreh lo a, hmingṭhat ringawt an tum lo," a ti.

Home Minister chuan, Zo hnahthlakte inremna a pawimawh thu sawiin, "Ṭawng inan loh avanga inenhranna a awm tur a ni lo. Zo hnahthlakten hmun hrang hrang aṭangin an Jerusalem Mizoram an rawn pan mek a ni," a ti a; Mizorama chengte'n hmun danga Zo hnahthlakte chu inphahhnuai taka an lo dawn sawn thiam a ṭul thu a sawi.

Martarte chu Mizoram tana zalenna (independent) sual tak taktute an nih thu sawiin R Lalzirliana chuan, "Rambuai vanga ram leh hnam tan theihtawp chhuah a, an nunna hial chánte an awm. Ṭhenkhat erawh thil dang vanga thite an ni. Independent sual lo a, Chief Minister nihna sualte pawh an awm a ni," a ti.

Martarte Thlanlung phun a nih laia MPYCC president John Rotluangliana chuan, rambuai vangin mi tam takin nunna an chàn thu sawiin, "Thih chhan inang lo mah se, ram leh hnam tana martar an ni a, thlanmual pawh nei loin an awm ṭhin a ni," a ti a; martarte'n thlanmual an neih tâk avangin an chhungte an lawm hle niin a sawi.

John Rotluangliana chuan, remna a awm hnuah MNF-te'n ro an rèl nghal thu sawiin, "Interim-in thla ruk chhung ro an rél a, inthlanah chiang taka thlan tlin zui an ni. Martarte thlàn lam an ngaihtuah lo hrim hrim," a ti a; MPYCC-te'n martarte thlanmual an siam tâk avanga martarte thlanmual siam ve leh hnuhnawhah MNF a puh.

MNF-te'n martarte ruhro politics khelhna atan an hmang nia sawiin John Rotluangliana chuan, "Hetianga mi rilru tihnat thar leh tum hi mihring mihrinnaah pawh a inzah loh thlak ka ti. MNF unaute hian chhunzawm tawh lo se ka duh," a ti.

Sesawnga Martarte Thlanlung din champha hmanna inkhawm hi Inkhawm hi MPYCC president Dr Lalmalsawma'n a kaihruai a; minister Zodintluanga leh Vanlalawmpuii Chawngthu, deputy speaker R Lalrinawma, MLA panga - Nihar Kanti Chakma, Lalrobiaka, Joseph Lalhimpuia, Dr Ngurdingliana leh Chalrosanga te pawh an tel a ni.

Congress ṭhalaite'n Martarte Thlan an siam hi June 27, 1997-ah MPCC president Lal Thanhawla'n a hawng a; lungphun hi ft. 35-a sang, kil li nei, a hmai palite ft. 15-a lian vek a ni a, martar hming 1,059 ziah tawh a ni.