BPL chhungkua an pung zel hi a pawi - ZPM Secretary General

Ṭangrual pawl, Zoram Peoples' Movement (ZPM) secretary general K Sapdanga chuan, Mizo­ram state puitling a nih aṭanga kum 30 hnuah below poverty line (BPL) chhungkua an pung zel chu thil pawi tak a nih thu a sawi.

ZPM-in nimina an pisaa office bearer meeting an neihnaah thu sawiin K Sapdanga chuan, "Mizoram state puitling kan nih kum 30 hnuah BPL chhungkua an pung chho zel hi a pawi tak zet a, sorkar laipui leh state zawng zawng hian BPL tihtlem hi an hna pawimawh a ni. Project hrang hrangte pawh hi mirethei dâwm kânna a nih laia Mizoramah BPL kan pung zel hi sorkar hlawhchhamnaah kan ngai. Sem policy ṭhat lohzia lantirnaah kan ngai a, VIP-te chan hi a chau reng mai a ni," a ti.

K Sapdanga chuan, Mizoram sorkarin NLUP a kalpui chungchangah, "Mizoram hi dikna leh rinawmnain hmun a chan lohna ram, dan palzûtna hmunah an chantir mek. Dik lo taka MLA-in an sem pawh hriatthiam theih a ni lo a, kum 2013 inthlana candidate tling zo lote'n an sem lek phei chu a demawm tak zet a ni," a ti a; Chief Minister-in a sawifiahnaa party dang diriam leh hmusit taka a ṭawngkhum phei chu a Mizo lo hle tih a sawi.

ZPM Secretary Gene­ral chuan, kumin kum tawp lama Mizoram inthlanpui lo awm turah policy sawi tur nei lo leh khârchhâwng mek party an awm thu sawiin, "Kum 10 chhung an kalpui mek her lum tum an awm nia a hriat a ni. Mipuite hi bum tlak kan awm tawh lo a, mipui thlim budget kan duh tawh lo a ni," a ti.

ZPM office bearers meeting hi ZPM Steering Committee vice chairman Lalthansanga'n a kai­hruai a, an hmalakna zel dan tur an ngaihtuah a ni.