September 30, 2018 ral hmain Mizoram Bru-te lak lêt tum a ni
Union Home minister Rajnath Singh chuan July 3, Thawhlehni tlai khan chief minister Lal Thanhawla leh Tripura chief minister Biplab Kumar Deb te chu New Delhi-a a pisaah koin, Mizoram Bru, Tripura-a relief camp-a cheng mekte Mizorama lâk lêt dan tur a sawipui. Meeting-ah hian Draft Agreement ziakin, Bru-te chu September 30, 2018 ral hma ngeia Mizorama hruai kîr tura ruahman a ni.
Rajnath Singh chuan, Mizoram leh Tripura Chief Minister-te chu a hranpaa a kawm hnuah Ministry of Home Affairs (MHA) leh state pahniha sorkar official-te bakah, Mizoram Bru Displaced People's Forum hotute a kâwm a; Bru-te Mizorama lâk lêt chungchanga Draft Agreement chu uluk taka ngaihtuah niin, Mizoram sorkar aiawhte'n an ngaihdante an thlen.
Bru hruai kîrna tura ruahmanna, Draft Agreement chu siam ṭhat ngaite siam ṭhat a nih hnuah pawmin, hming an ziah hnan a; Draft Agreement angin, Tripura relief camp-a Bru-te chu kumin September 30 ral hma ngeia Mizorama lak lêt tura ruahman a ni.
Agreement-ah hian Mizoram sorkar aiawhin Home secretary Lalnunmawia Chuaungo leh Tripura sorkar aiawhin chief secretary Sanjeev Ranjan ten hming an ziak a; MHA aiawhin special secretary (Internal Security) Rina Mitra leh Mizoram Bru Displaced People's Forum aiawhin president A Sawibunga ten hming an ziak. Union Home minister Rajnath Singh leh Mizoram leh Tripura Chief Minister-te chu hriatpuitu (witness) an ni thung.
Meeting-ah hian, chief minister Lal Thanhawla chuan, Zokhawthara Ṭiau leia Assam Rifles-in sumdawnna bungraw phur truck an dang chu ngaihven tur leh, lirtheite chu Assam Rifles-in a rang thei ang bera chhuah theih nana hma la turin Union Home Minister a ngen a; Zokhawsang, Aizawla Assam Rifles sawn chungchang a sawipui bawk.
Meeting-ah hian MHA aṭangin Home Secretary, Special Secretary, Adviser (NE), Joint Secretary (NE) leh Intelligence Bureau Director-te an tel a; Mizoram CM Lal Thanhawla hi Home Secretary bakah OSD (Home) David H Lalthangliana ten an ṭawiawm a ni.