Aizawla cement company kudam khârsak
All Mizoram Cement & Iron Rod Dealers Association (AMCIRDA) chuan cement company pahnih - Dalmia leh Star Cement company-te kudam, Aizawla mi chu cement man tihsan vangin July 3, Thawhlehni zan khan an khârsak. An hmalakna hi thláwp turin mipui an ngen nghal.
AMCIRDA hruaitute chuan nimin khan Aizawl Press Club-ah thuthar thehdarhtute kâwmin, company ṭhenkhatin cement man an tihsan vanga an hmalakna an puang a; an vice president Lalnunthari chuan, cement company ṭha, Mizote hriatthiamna pe theitute duhsak tur leh Mizote hrethiam thei lotu company-tye chu hnâwl ngam turin Mizo mipui a sáwm.
Lalnunthari sawi danin, cement company pahnih - Dalmia leh Star-te chu June 26, 2018 khan cement ip khat man chu Rs. 15-in an tisang a, a hnu lawkah Max, Topcem leh Black Tiger ten an tisang ve zui nghal a ni. Cement man tihsan chu ṭha an tih loh avangin AMCIRDA chuan July 3, 2018 tlai dar 5 ral hmaa a man tihniam leh turin June 30 khan company pangate chu an ngen a; an tihhniam loh chuan an cement-te Mizoramah zawrh an phal loh tur thu an hriattir nghal a ni.
Lalnunthari chuan, an ngenna angin rate tisangtu company panga zinga pahnih - Max leh Black Tiger-te chuan cement man an tihsan tawh chu an tihniam leh niin a sawi a, "Dalmia, Star Cement leh Topcem-te hian kan ngenna chu engahmah min ngaihsak tâk loh avangin Dalmia leh Star Cement kudam kan kalhsak ta a ni," a ti. Topcem erawh chuan Mizoramah kudam an nei lo niin a sawi.
Cement man tisangtu company-te'n an tihsan chhan an sawi chu - an hralh tlêm vanga an hloh hmuh lêtna (loss recovery) atana Mizoram bikah a rate an tihsan thu an sawi chu an pawmpui thei lo tih sawiin, "Kan chhui chiang a, Assam, Meghalaya leh Tripura-ah pawh rate tisang loa Mizoramah chauh an tito hi kan hrethiam thei lo a, Mizo min hmuhsitnaah kan ngai nghet tlat a ni," an ti.
AMCIRDA hruaitute chuan, Dalmia, Star, Topcem cement-te Mizoramah lak luh leh zawrh phal ni rih lo mah se, company dang - Valley Strong, Max, Taj Cement, Black Tiger, Best Cement leh Amrit cement-te lei tur a awm reng tho dawn avangin cement lei turah harsatna lian a awm loh an beisei thu an sawi bawk.