KHAWTHLIR

Editor thi
Kolasib-a ni tin chanchinbu Duhlai editor C Thanmawia (50), Kolasib Hmarveng chu July 3, Thawhlehni zan dar 11:15 khan cancer vangin a thi a, nimin khan vui a ni. C Thanmawia hian a nupui Lalramthangi leh a tu leh fate panga a kalsan a; nimina a vuinaa tel turin MJA general headquarters aṭangin president Zonunsanga Khiangte leh hruaitu dangte an kal a ni.

Thisen pe
Lawngtlaia Region Higher Secondary School NSS unit chuan nimin khan an sikulah blood donation camp an huaihawt a, Lawngtlai District Hospital tan thisen unit 56 an pe a, a petute mipa 41 leh hmeichhia 15 an ni.

Free eye clinic
National Highways and Infrastructure Development Corporation (NHIDCL) leh Synod Hospital ṭang dun chuan nimin khan Synod Hospital-ah a thlawna mit entirna an buatsaih a, Aizawl DC Dr A Muthamma-i'n a hmanpui. Free Eyey Clinic hi NHIDCL corporate social responsibility (CSR) kaltlanga buatsaih a ni a, mi ṭhahnem tak an inentir. DC hian Synod Hospital-a Integrated Counselling and Testing Centre a tlawh bawk.

Tobacco awareness
Nimin khan Kolasib Circuit House-ah zirlaite pualin vaihlo ṭhat lohzia inzirtirna hun buatsaih a ni a, Kolasib DC Dr Arun T-in a hmanpui. He hunah hian Kolasib Bawrhsap bakah, footballer Jeje Lalpekhlua'n thu a sawi a; National Tobacco Control Programme-a district nodal officer Dr C Vanlalhlimpuia'n vaihlo ṭhat lohzia leh hriselna a tihchhiat theih dante a sawifiah a ni.

MIMA-in thláwp
Mizoram Merchants Association (MIMA) chuan, Mizorama hnam dang tipper dan loa register-te Mizorama hna an thawh ve lohna tura Mizoram Tipper Association hmalakna chu an thlàwp thu an tarlang a; All Mizoram Cement & iron Rod Dealer's Association-te'n cement man tihsan vanga company pathumte cement Mizorama zuar lo tura hma an lakna chu an thlàwp thu an sawi bawk.