PWD NH Division-V hawn a ni

PWD minister Lal Thanzara chuan nimin khan Thingdawl High School complex-ah PWD National Highway Division-V a hawng. Minister chuan, NH Division office thar hawn theiha a awm chu lawmawm a tih thu sawiin, Thingdawl mipui tan malsawmna thlentu a nih a beisei thu a sawi.

Lal Thanzara chuan, social media hman fimkhur a ngaih thu sawiin, "Thu dik hre chiang loa thehdarh vak vak hi bànsan a hun tawh a, thu dik hriat chian tum hmasak hram hram a ṭha. Sêlna leh indemna ringawt ai chuan, rawtna leh infinchhuahna hi ram hmasawn nan a ṭangkai zawk a ni," a ti.

Mizoram chu leilung naupang tak, lei hnip tak a ni tih sawiin, "Duh vang reng ni loa khuarel chhiatna thlen chángin kawngpui leh lei dawhte a lo chhe palh ṭhin a, heng hunah hian in táwngpáwng sêl ngawt loin, kalhmang ṭha zawk leh hmalak dan tur ṭha zawk hria chuan hawihháwm taka infin­chhuah zel ni se," a ti a; rawtna leh infin­chhuahna ngaithla turin sorkar a inhawng reng tih a sawi.

PWD Minister chuan, PWD chu mipui beisei phak loh cháng an nei ṭhin tih sawiin, "Fakna thu aiin selna ànká an dawng tam zawk a ni," a ti a; sawiselnate chu lung loa la mai lo a, mipui leh ram tan theihtawp chhuaha thawk chhunzawm zel turin PWD engineer-te leh thawktute a chah.

PWD NH Division-V hi Lawngtlaia Multi Modal Division-II ni ṭhin kha a ni a, Lawngtlai Multi Modal Project tam zawk thawh zawh a nih avangin Kolasib PWD Division chu Mizorama PWD Division lian ber pawl leh hna ngah ber pawl an nih avangin Thingdawlah sawn a ni.

Sorkar thuchhuah tarlan danin, tun din­hmunah Mizoramah kawngpui km. 7,500 vel a awm a, Mizoram PWD-in km. 6,000 vel enkawlin, BRO-in km. 900 vel an enkawl. Mizoramah NH km. 1,410.5 a awm mek bawk.