Union Minister Aizawlah lo thleng

Social Justice and Empowerment Ministry changtu minister of state Krishan Pal Gurjar chu nimin khan Aizawlah a lo thleng a; Mizoram sorkara Social Welfare secretary K Vanlalrawni leh director Laldikkimi ten a thlenna Raj Bhavan-ah an kâwm.

Rualbanlote'n sorkar aṭanga an dawn tur dik tak an dawn theih nan sorkar laipuiin ram puma hman theih tur identification card a siam a; chutih rualin, identification card siam turin doctor leh department hotute'n a hmunah kal chilha an endik a ṭul ṭhin avangin, thingtlang kilkhawr zawk kalna tura an mamawhte Social Welfare department hotute hian an thlen a ni.

Accessible India Campaign hnuaia Mizoram sorkar building eng emaw zatah rualbanlote kal theihna turin lift/ramp siam belh tuma hmalakna a puitlin theih nan sorkarin sum a mamawh belhte pek chhuah thuai a nih theih nan hma lakpui turin an ngen a; bengngawngte tana bengdár ṭha chi vuah (cochlear implant) chungchang leh mitdel hawrawp chhutna tur Braille Press dilnate an thlen bawk.

Mizoram Social Welfare department hotute thu thlente hi a lo en zui tur thuin Krishan Pal Gurjar chuan a chháng a ni.