Mizoram chhungah kawlphetha MW 44 vel siam chhuah mek a ni

Tunlaia Mizorama hydel power project hrang hrang aṭanga kawlphetha siam chhuah chu megawatt (MW) 44 vel a tling a; Tuirial Hydro Electric Power (HEP) Project hman theih a nih hnuah Mizorama kawlphetha siam chhuah a pung hle nia thu dawn a ni.

Thu dawn danin, July 3, Thawhlehni zana Mizoram chhung hmun hrang hranga hydel project aṭanga khawlphetha siam chhuah zat chu MW 44.85 a ni a; chu'ngte chu - Tuirial HEP aṭang­in MW 36.6, Serlui-B Hydel Project aṭangin MW 4, Kau-Tlabung HP aṭangain MW 2.3, Khawi­va HP aṭangin kilowatt 500, Maicham-I aṭangin KW 600, Maicham-II aṭangin KW 700 leh Tuipanglui HP aṭangin KW 150 a ni. Phai lam aṭangin MW 43 vel lak luh a ni bawk.

Kawlphetha megawatt 60 pe chhuak thei tura siam Tuirial HEP hi December 16, 2017 khan prime minister Narendra Modi-a'n a hawng a; hawn a nih hma, October 2017 aṭangin kawlphetha pek chhuah ṭan a ni.

Tuirial HEP aṭanga kawlphetha siam chhuah chu ram neitu nihna angin Mizoramin a thlawnin 12% a chang a; a bâk 88% chu Central Electricity Regulatory Commission rate siam angin Mizoram sorkarin a lei dawn a, mahse, rate bithliah a la nih loh avangin tunah hian unit khat zelah Rs. 1.78-a lei mek a ni.