Police-in motor an nei ṭha loah PRISM-in an ngai

PRISM party ṭhalai hruaitute chuan, July 2-3, 2018 khan Mizoram Police lirthei neih dan a hmunah kalin an zir chiang tih sawiin, Police-in lirthei an neihte a ṭhat tâwk tawh lo a, motor an neihte chu awmze nei lehzuala kalpui a ṭul hlea an ngaih thu an sawi.

PRISM ṭhalai president RL Liantluanga chuan, Police-te chu sualna leh thil ṭha lo a lo thlena mipuiin an koh ber, mipui himna ngaihtuahtu an ni tih sawiin, "Chet zung zungna tur lirthei ṭha an mamawh. Tuna an dinhmun enin, Police ṭuan rang leh chak ṭha lehzual kan neihna turin hmalak a ṭul hleah kan ngai," a ti.

RL Liantluanga sawi danin, tuna Police lirthei kawl hlui ber chu prison van, April 4, 1994-a lei, MZ-01 6528 a ni a, kum 24 chuang hman a ni tawh. Lirthei thar nei ve zauh mah se, police station (PS)-te'n lirthei an kawlte chu a hlui tawh tlangpui.

Mizorama PS leh outpost-te lirthei kawlte chu a hlui tawh hlawm avangin siam a ngai zing hlawm a, rang taka che zung zung turin harsatna an tawk nia sawiin RL Liantluanga chuan, "Indaih lohna a nasat avangin thingtlang lama police case ṭhenkhatah phei chuan FIR submit a niha investigation ti tura kal a ngaihin police-in mipui hnenah diesel/petrol man tumsak an phut ṭhin niin kan hria," a ti a; lirtheia police harsatna chingfel turin sorkarin hma la se an duh thu a sawi.

PRISM ṭhalai President chuan, an party-in sorkarna an siam chuan police thuam ṭhatna lam an ngaih pawimawh dawn thu a sawi bawk.

Police station-te motor neih dan
Aizawl SP hnuaiah
# Aizawl PS-in Sumo pakhat MZ-01 F-0981, Gypsy pakhat MZ-01 B-6703.
# Bawngkawn PS-in Sumo MZ-01 F-0986, Gypsy MZ-01 B-2952 leh bike pakhat.
# Kulikawn PS-in Sumo pakhat MZ-01 F-0979, bike pahnih.
# Vaivakawn PS-in Sumo pakhat MZ-01 G-1035, bike pakhat.
# Zonuam Outpost-in Gypsy pakhat MZ-01 B-2985 leh bike pakhat.
# Saitual PS-in Gypsy pakhat leh bike pakhat.
# Sairang PS-in Gypsy pakhat.
# Sakawrdai PS-in Gypsy pakhat.
# Sialsuk PS-in Gypsy pakhat leh bike pakhat.
# Falkawn Outpost-in Gypsy pakhat leh bike pakhat.
# New Vervek Outpost-in bike pakhat.
# PS-te indaih lohna phuhhrûk nan Motor Transport Station-in Gypsy pakhat, Sumo pathum, pick-up pakhat, truck pathum, bike pathum.

Lunglei SP hnuaiah
# Lunglei PS-in Sumo pakhat leh bike pahnih.
# Hnahthial PS leh Bunghmun PS ten Gypsy pakhat ve ve leh bike pakhat ve ve.
# Lungsen PS-in bike pakhat.
# South Vanlaiphai Outpost leh Hrangchalkawn Outpost ten bike pakhat ve ve
# Thingsai PS leh Tlabung PS-te'n Gypsy pakhat ve ve.

Siaha SP hnuaiah
# Siaha PS-in Sumo pakhat leh bike pahnih.
# Phura PS leh Tuipang PS ten Gypsy pakhat ve ve.
# Lungbun Outpost, Kawlchaw Outpost leh STKN Outpost ten bike pakhat ṭheuh.
Champhai SP hnuaiah
# Champhai PS-in Sumo pakhat leh bike pakhat.
# Khawzawl PS, Ngopa PS leh Zokhawthar Outpost ten Gypsy pakhat ṭheuh.
# Dungtlang checkpost-ah bike pakhat.

Kolasib SP hnuaiah
# Kolasib PS-in Sumo pakhat leh bike pakhat.
# Kawnpui PS-in Gypsy pakhat leh bike pakhat.
# Bairabi PS leh Vairengte PS-in Bolero pakhat ve ve leh bike pakhat ve ve.
# Bilkhawthlir Outpost-in Gypsy pakhat.

Serchhip SP hnuaiah
# Serchhip PS-in Sumo pakhat, 407 truck pakhat, bike pakhat.
# North Vanlaiphai PS leh Thenzawl PS-in Gypsy pakhat ve ve.

Lawngtlai SP hnuaiah
# Sangau PS-in Gypsy pakhat an nei.
# Lawngtlai PS-in Gypsy pakhat, TATA 712 pakhat, 407 van pakhat leh bike pakhat.
# Chawngte PS-in Gypsy pakhat leh bike pakhat.
# Bungtlang Outpost-in Gypsy pakhat.
# Borapansuri PS leh Bualpui-NG PS ten bike pakhat ve ve.

Mamit SP hnuaiah
# West Phaileng PS-in Gypsy pahnih leh bike pakhat.
# Zawlnuam, Kawrthah, Kanhmun, Mamit, Marpara PS-te'n Gypsy pakhat ṭheuh.