MYC Chairman leh US university hotute inkâwm

Mizoram Youth Commission (MYC) chairman Joseph Lalhimpuia, MLA chuan July 3, Thawhlehni khan a pisaah USA-a Columbia University leh Stanford University-a mithiamte a kâwm a; Mizoram ṭhalaite zirnaa hma an sawn theih dan tur a sawipui.

MYC Chairman-in a kawmte hi Columbia University-a Political Science department-a mi Prof. Nikhar Gaikwad leh Kolby Hanson te, Stanford University-a Political Science department-a mi Aliz Toth te an ni a; Gulf country-a hospitality lama thawk tura Mizo ṭhalaite training pek chungchangah MYC Chairman chu thawhpuiah an sáwm a ni.

University pahnih hian Gulf rama hna thawhtir ṭhintu Vira International te, training petu Free Climb leh survey lam khawihtu Cvoter-te an thawkpui mek niin an sawi.

Joseph Lalhimpuia chuan, university pahniha hotute'n an sàwmna chung­changah, Mizo ṭhalaite tan a ṭhat dan tur te, a him leh him loh dante thil ṭul dangte an lo zir chian phawt tur thuin a chhang a; zir chian hnuah a ṭul anga la inbiak chhunzawm a, Mizo ṭhalaite tana ṭha leh ṭangkai tur a nih chuan thawhho dan tur uluk taka ngaihtuah theih a nih tur thu a sawi.

Sorkar thuchhuah tarlan danin, Colombia University leh Stanford University hotute sàwmna hi tihhlawhtlin theih a nih chuan, Mizo ṭhalai 250vel a thlawnin Aizawlah training pek an ni a, training chhuakte chu Columbia University-in certificate a pe ang a; chu chu India ram páwna hna thawh nan hman ṭangkai theih a ni dawn a ni.