Vairengtea checkgate hrang hrang sawiho

Vairengtea sorkar checkgate nei sorkar hrang hrang hotute leh Vairengte khawtlang hruaitute chu Kolasib DC Dr Arun T chuan July 3, Thawhlehni khan checkgate chung­chang a sawipui a; mipui leh lirthei khalhtute tana awlsam zawk tur leh thil tih a felfai zawk theih dan tur an sawiho.

Meeting-ah hian, checkgate-te chu hmun hran hrana a awm avang­in harsatna thlen dante sawiho a ni a; Transport department leh Excise & Narcotics department checkgate-te chu Police checkgate hnaiha awm turin an rel a, Excise & Narcotics emaw, Police emaw, hnathawh tibuai lo leh dîpdâl lo zawnga hmalak ni se, an ti.

FCSCA (Supply) Reporting Office, AH&Vety checkgate, Trade & Commerce checkgate leh EFCC (Forest) checkgate-te chu Taxation building ruahsan taka awm turin an ti a; Rengtekawna Transport checkgate awm mek chu sorkar tan chhiah tam zawk lak luh theih beiseiin Bairabi-ah sawn lailâwk an rel bawk.