Maxicab chuan man tihniam turin hriattir

Mamit Maxicab Welfare Association (MMWA) chuan June 25, 2018 aṭangin Mamit leh Aizawl inkara maxicab chuan man mi pakhatah Rs. 250 ni ṭhin chu Rs. 300-ah an tisang a; hemi chungchang hi Mamit District Transport Officer (DTO)-ah complaint an awm avangin Mamit DTO chuan maxicab chuan man chu Rs. 250-ah tihniam leh turin a hriattir.

Mamit aṭanga thu dawn danin, MMWA-in Mamit-Aizawl maxicab chuan man Rs. 300-ah an tisang chu mipui tan phurrit leh State Transport Authority (STA)-in rate a siamsa palzûtna nia ngaiin C Lalramdinzela, Mamit Venghlun-in June 26-ah ziakin Mamit DTO-ah lungawi lohna a thlen a ni.

Complaint lut chu Mamit DTO H Lal­hmingliana chuan July 3 tlai khan a pisaah a kaihhnawih pawl hrang hrangte a sawipui a; Mamit-Aizawl maxicab chuan man chu Rs. 250 ni turin thutlukna a siam a, chu chu July 4, 2018-a hman ṭan nghal tur a ni. Chutih rualin, Rs. 250 a nih hian, maxicab-te chu Aizawla Chanmari tlan thleng tura tih an ni bawk.

Meeting-ah hian MMWA hruaitute chuan, an rate tihsanna, Rs. 300 chu Mizoram Maxicab Owners Association (MMCOA)-in rate a siam leh hmun dangah pawh hman vek tawh ang a nih thu leh, MMWA chu a hmang hnuhnung pawl an nih thute an sawi. Chutih laiin, Mamit Sub-Hqrs YMA, Mamit Joint V/C leh Mamit district MJA aiawhte chuan MMWA chu maxicab rate bithliah thei an nih loh avangin, STA-in rate a siam ang chu zawm mai ṭha an tih thu an sawi thung.

DTO H Lalhming­liana chuan, MMWA-in anmahni thua rate an siamah Mamit mipui náwlpui an lungawi lo nia a hriat thu a sawi a; Transport Director-ah pawh hmun hrang hrang aṭangin lungawi lohna thu a luh mek thu leh a luh belh zel rin a nih thu a sawi bawk.