MNF party duh dan angin MP-in CAB-ah vote a thlak - Dy.Speaker

Pang Zirlai Pawl (PZP) chuan January 7-9 chhung khan Chamdurtlangah General Conference vawi 33-na an hmang a, nimin khan Assembly deputy speaker Lalrinawma'n a hmanpui. Lalrinawma chuan, party hminga thlan tlin MLA leh MP-te'n an party duh dan kalha an awm a rem loh avang­in Mizoram Lok Sabha MP-in MNF duh dan angin CAB a thlawp tih a sawi.

Inkhawmpui pandal, Saikhawpui Rûna inkhawm­ah Lal­rinawma chuan, rilru put­hmangin thlen chin a hril ṭhin tih sawiin, "Zirlaite pawh kan rilru puthmang a san chuan kan thlen chin pawh a sang mai dawn a ni," a ti a; Zo hnahthlak hnam hrang hrangte'n hma an sawn loh chuan Mizo pumpui angin hma sawn a harsa dawn tih a sawi.

Assembly Deputy Speaker chuan, Zo hnahthlak hnam hrang hrangte'n hnamzia, nun­phung, ṭawng leh hmunhmate an inzahsak tawn a pawimawh thu a sawi a, "Kan ṭawngte pawh kan zahpui tur a ni lo. Pathianin hnam dang ngaisang tura a din kan ni lo a, a hranpaa siam kan ni. Keimahni leh keimahni kan inngaihsan loh chuan, kan ram luahah pawh kan buai mai a ni," a ti.

Citizenship Amendment Act chungchangah Lalrinawma chuan, tuma'n an duh lo a, Mizoram Chief Minister pawhin sorkar laipui a dàwr tih a sawi a, "Mizoram min telh ta lo a, kan lawm hle. Kan CM-in a lo sawi tawh angin, CAB pawh kan duh dan ang ngeiin Mizoram kan tel ve lohna turin an siam ṭha a, kan duh anga Bill an siamṭhat avangin kan vote ta a ni. Mi tam takin kan MP an ûm zui luih luih a, a pawi ka ti tak zet. Anti Defection Law paragraph 2(b)-in a sawi angin, party hminga thlan tlin MLA leh MP-te hi party duh dan kalha an awm a rem lo a, kan MP pawhin chutiang chuan a vote mai a ni," a ti a; party whip kalha a vote a thiang lo tih a sawi.