Ni hnih chhungin hripui vei Mi 717 hmuh chhuah a ni

Mizoramah Covid-19 vei November 26, 2021 khan mi 359 leh November 27, Inrinni khan mi 358 hmuh belh a ni a, ni hnih chhungin mi 717 hmuh chhuah a ni. Inrinni leh nimin khan hripui vei dam tawh mi 282 chhuahtir an ni a, Covid-19 vangin mi pahnih an thi.

Covid-19 vei November 26-a hmuh chhuahte chu mipa 143 leh hmeichhia 216 an ni a, ZMC laboratory-a hmuh 16, TrueNAT hmanga hmuh 27, RAT hmanga hmuh 312 leh FIA hmanga hmuh pali an ni. November 27-a hmuh tharte chu mipa 151 leh hmeichhia 207 an ni a; ZMC-a hmuh 65, TrueNAT hmanga hmuh 14, RAT hmanga hmuh 271 leh FIA hmanga hmuh pariat an ni.

IDSP record angin, Mizoramah Covid-19 vei 1,34,279 hmuh chhuah a ni tawh a, mipa 64,894 leh hmeichhia 69,385 an ni a, mipa aiin hmeichhia 4,491-in an tam zawk. Nimin tlai dar 5 thleng khan mi 1,29,954 (96.78%) chhuahtir an ni tawh a, mi 491 (0.37%) thi tawhin, enkawl mek mi 3,834 (2.85%) an awm.

November 26, Zirtawpnia Covid-19 vei hmuh thar mi 359 zingah symptom nei mi 265 an awm a, symptom nei hi hmuh chhuah zat aṭangin 68.12% an tling a; mi 94 erawh chuan symptom an nei lo. Zirtawpnia hripui vei hmuh chhuah 359 zingah Phuaibuang khaw mi 29, symptom nei vek leh Daido khaw mi 20, symptom nei vek leh Lungdai khaw mi 30 an tel a; Boston Higher Secondary School, Mission Veng zirlai mi 10 an tel bawk.
November 27, Inrinnia Covid-19 vei hmuh thar mi 358 zingah symptom nei mi 244 an awm a, mi 114 erawh chuan symptom an nei lo.

Inrinnia hripui vei hmuh chhuah mi 358 zingah Phuaibuang khaw mi 21, symptom nei vek, Khawlian mi 16, symptom nei vek leh Daido khaw mi 10, symptom nei vek an tel. Heng khaw pathumte hi inṭhenawm an ni a, ni thum chhungin Phuaibuangah mi 106 leh Daido-ah 48 hmuh chhuah niin, symptom nei vek an ni.

Covid-19 positive Inrinnia hmuh zingah hian sikul leh hostel-a zirlai leh zirtirtu hmuh chhuah an awm nual a; RSPC School, Luangmualah mi 28, St. Joseph’s HSS Hostel, Ramhlun North-ah mi paruk leh Home Missions School hostel-ah mi pathum an awm.

Tun November thla chhungin Mizoramah Covid-19 vei mi 12,755 hmuh chhuah a ni tawh a, chawhrualin ni tin mi 472.41 hmuh chhuah an awm ang a ni a, a tlahniam hret hret zel. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 27, 2021 thlenga swab sample endik tawh 14,22,888 aṭanga RT-PCR hmanga endik zat percentage chu 22.74 a ni a, RAT hmanga endik zat chu 71.36% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,34,279 chu mi 1,000 zelah hripui vei mi 122 an awm ang a ni a; mi 1,00,000 zela Covid-19 vangin mi 44 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 282 chhuahtir an ni a; Aizawl district-ah mi 165, Lunglei district-ah 55, Mamit district-ah 37, Champhai district-ah 16, Hnahthial district-ah panga, Lawngtlai district-ah pathum leh Kolasib district-ah pakhat an chhuak. Inrinni khan mi 466 chhuahtir an lo ni tawh bawk.