Helicopter thlawhtir nan kum khatah Cheng nuai 750-800 vel sên a ni

Mizorama Pawan Hans helicopter thlawhtirna atan Mizoram sorkar chuan kum khatah cheng nuai 750-800 inkar vel a seng ṭhin a; senso zat aṭanga a tam zawk, 75% chu sorkar laipuia Ministry of Home Affairs-in a tum a, Mizoram sorkarin 25% a tum thung.

Tun hma deuh khan Mizoramah helicopter a lo thlâwk tawh ṭhin a, hun eng emaw chen tihtawp a nih hnuah kum 2012 aṭangin a tlawhtir leh ṭan a ni. Helicopter atana sum senso hi tam mah se, hmanhmawh thila damlo phurhna atan ṭangkai taka hman ṭhin a ni avangin sorkar hotute chuan tihtawp mai chi a ni loah an ngai.

GAD Civil Aviation Wing hotute'n Vanglaini palai an hrilh danin, Pawan Hans helicopter hman man (fixed monthly charge) atan sorkarin thla khatah Rs 68,79,158 a sêng ṭhin a, darkar khat zela a thlawh laia hman man (hourly flying charge) atan Rs 82,957 sén ṭhin a nih bakah, helicopter chu darkar 80 a thlawh chuan Rs 13,315,718 sên a ngai bawk.

Helicopter hman man hi passenger ticket man leh hman man zawng zawng belh khawm hnuah senso zinga 75% chu Ministry MHA-in a tum a, Mizoram sorkarin 25% a tum thung a ni.

Mizoram sorkarin helicopter thlawhtirna atana a senso hi tam mah se, chetsualna leh natna avanga rîkrum thilah nunna chhanna atan a ṭangkai êm avangin sorkar tan tihtawp mai chi a nih an rin loh thu Aviation Wing hotute chuan an sawi.

GAD Aviation Wing hotute sawi danin, Pawan Hans helicopter Mizorama hman reng a nih bik chhan Mizoram sorkar chuan MHA aṭangin zawhna a lo dawng tawh a; MHA hnenah hian Pawan Hans hian 75% subsidy-a an hmantir theih awmchhun a nih avanga hman a nih thuin an hrilhfiah tawh.

Mizoram sorkar leh Pawan Hans inremna ang chuan, tuna Mizorama helicopter thlâwk mek chu August 14, 2021 aṭanga February 13, 2022 thleng tur a ni a, inremnain a huam chin a tawp hnuah thlawhtir zel a nih dawn leh dawn loh chu ngaihtuah ṭhat leh tur a ni.