MJA-te'n Mizoram-Assam ramri hrûla Kawng laih thar leh sipai camp an tlawh
Mizoram Journalists Association (MJA) General Headquarters hruaitute chuan November 27, Inrinni khan Vairengte ram chhunga tun hnaia Mizoram sorkar hmalakna, kawng laih thar leh sipai awmna camp-te an tlawh.
Vairengte Joint VC leh Joint NGO sàwmna angin MJA hruaitute hian Mizoram leh Assam ramri bul hnai, Vairengte ram chhunga sorkar hmalaknate a hmunah an tlawhpui a, hmachhawp la awmte an enho. Vairengte Joint VC chairman R Lalfamkima chuan, Assam nen ramri chungchanga tun hnaia buaina a awm hnuah sorkarin ramri vên leh tihchangtlunna lamah nasa taka hma a lak thu a sawi.
Vairengte Joint VC Chairman sawi danin, ramri hnaiha kawng laihte chu ramri vengtu sipaite bakah, kawng hnaiha huan lo ram neitute'n an chhawr hle a ni.
Tun hmaa kawng la awm ngai lo, Saihapui-V leh Phainuam lamah km. 10 vel ramri vênna atan kawng laih a ni a, Saipum lamah km. 32 laih a ni. Kawng laihna atan sum awm sa awm lo mah se, sorkarin VC leh YMA-te enkawl tura ruatin, a ṭul angin sum an ngaihtuah zel a ni.
MJA hruaitute aṭanga thu dawn danin, ramri hnaihah hian Mizoram police-te'n Assam police-te camp an kárcheh deuh zel a, harsatna lian tham leh mamawh lian tham neih loh an nei hran lo nia a lan laiin, kawlphetha lamah ṭha zawka thuam an mamawh thung. Tunlai hian sorkar leh Vairengte Joint VC hmalaknain awm hmun ṭha zawk, puan-in kaih ngawt ni lo, barrack (bahrik) ṭha zawk sak chhoh mek a ni bawk.
Vairengte Joint VC Chairman chuan, ramri hrúl tihhmasawn kawngah an bialtu MLA Lalrinsanga Ralte, Kolasib DC Dr H Lalthlangliana, SDO(C) Isaac C Lalrempuia leh police hotute chungah an lawm hle tih a sawi a, "Kan bawh chin ram nei nghet tur leh inremna tluantling nei a, ramri dep khaw lama hmasawnna chak zawka a kal theih kan duh hle," a ti.
Ramria kawng laihte
• Vairengte CHC péng - Sihpui zau (km. 4)
• Sihpui zau péngṭhuam - Sabual zau (km.2.5)
• High School Tuichhuah tlang kawng (km.1)
• Horticulture Farm - Tlangpui camp (km.5)
• Tlangpui péng - Darthanzauva huan tlang camp (km.1)
• Horticulture Farm - Upper Aitlang Camp (km.4)
• Zarpuia phai - Phaisen kawng (km.2)
• Upper Aitlang Camp - Phaisen kawng (km.3)
• Vairengte IOC - Phaisen kawng (km.16)
• Auto Stand - Mautui Camp (km.2)
• Phainuam kawng - Mautui zau Camp (km.4)