ASF vanga vawk thi zat a tlahniam

Mizoramah vawk hri, African Swine Fever (ASF) avanga vawk thi zat a tlahniam zel a, district hrang hrangin an huam chhunga ASF vanga inkhuahkhirhna eng emaw zat an thlahdul tawh.

Nimin thleng khan ASF vangin vawk 29,799 a thi tawh a, March 21, 2020 aṭanga nimin thleng khan ASF lênna (infected area) 271 a awm tawh bawk. October 1-28, 2021 chhung khan Mizoramah ASF vanga vawk 1,056 a thih laiin, November 1-28 inkarah vawk 140 chauh a thi a, a inthlauhna 916 a tling. November thla ni 28 chhung hian vawk thi awm loh ní ni ruk a awm.

ASF nodal officer Dr Lalhmingthanga, AH&Vety joint director (Livestock Health) chuan Vanglaini palai zawhna chhángin, Mizorama ASF léng chu a ziaawm tial tial tih a sawi a, "Hri lêng reng reng hian reh hun a nei ṭhin a, tuna Mizorama ASF léng pawh a ziaawm tial tial. Nakkum February thlaah chuan tuna AH&Vety department-in kan hmalakna zawng zawng - vawk thi buaipuina leh a kaihhnawih thilte hi kan chinfel theih tawh kan beisei," a ti a, chumi tur chuan theihtawp an chhuah mek tih a sawi.

Hmarchhak state hrang hrangah ASF a léng mek tih sawiin Dr Lalhmingthanga chuan, "Tunah hian hmarchhak state zawng zawng deuh thawah ASF a léng mek a, Mizoram sorkar angin hmalakna an nei ve si lo a, fimkhur a ngai hle," a ti a; "February 2022-ah ASF kaihhnawih thilte kan chinfel theih chuan bul ṭan thar lehna lamah ruahmanna leh hmalakna kan nei zui theih tawh ang," a ti bawk.