Guwahati-a NE Sports Conclave-ah Robert Romawia leh Lalnghinglova tel

Assam sorkar leh The Hindu chanchinbu chuan November 26, 2021 khan Radisson Blu Hotel, Guwahati-ah NE Sports Conclave an buatsaih a, Mizoram aṭangin Sports & Youth Services minister Robert Romawia Royte leh Mizoram Football Association (MFA) honorary secretary Lalnghinglova Hmar te an tel.

Robert Romawia Royte chuan, Mizoramin phûl lem phah khelmual 10 a neih tawh bakah, a thar 24 a neih belh thuai dawn thu a sawi a, "Hengte hi kawng hrang hranga sum zawn khawm aṭanga neih tur a ni. State ṭhenkhatah stadium ruak a tam a, an hmang ṭangkai tâwk lo a ni thei. Mizoramah erawh chuan hman theih hun tur innghah ngai khawpin stadium indaih lohna a la nasa a ni," a ti.

Sorkar laipui thuneitute'n kum 2018 aṭanga DoNER hnuaia NESIDS leh NEC scheme-te tidanglama infiamna ruhrel siamna tur an titawp chu fuh lo a tih thu sawiin SYS Minister chuan, "Hemi chungchangah hian hmarchhak state hrang hrangte ṭangruala kan beih tlàn a ngai," a ti a, infiamna hmasawnna tura hmarchhak state-te'n sum an hmuh ṭhin a tawp chu a uiawm thu a sawi.

Robert Romawia chuan, National Education Policy 2020-in infiamna a ngaih pawimawh thu pawh sawiin, "Tun hmaa co-curricular activity ni ṭhin kha tunah chuan curriculum-ah a awm tawh dawn avangin sports hi India ramah a lian tawlh tawlh dâwn a, hemi atan hian inbuatsaih ṭhat a ngai dawn a ni," a ti.

Conclave-ah hian Lalnghinglova Hmar pawhin thu sawiin, football-a Mizoramin hmasawnna a neih dan leh hmachhawp a neih hrang hrangte a tarlang.

Sports Minister hian November 26-ah vek khan Guwahati Mizo Welfare Association-in ni hnih awh tur infiamna hun an buatsaih a hawng a; hlim taka hmang tura duhsakna hlanin, an senso phuhrûk nan Rs 1,00,000 a pe a ni.