Covid-19 vangin mi 491 thi tawh

Nimin khan tlai dar 5 thlengin Covid-19 vangin mi pakhat a thi a, November 27, Inrinni khan mi pakhat a thi bawk a; November 23, 2021-a thi tawh hripui vanga thi tih Inrinnia puanzar thar pakhat a awm bawk. Mitthi pathumte hi natna dang nei tel vek an ni.

IDSP, Mizoram tarlan danin, nimin tlai dar 5 thlengin Mizoramah Covid-19 vangin mi 491 an thi tawh a, tun November thla bikah mi 59 an thi tawh.

November 23, 2021-a Covid-19 vanga thi, November 27-a puanzar thar chu R Zothanmawia (67), Thakthing Veng a ni a, November 23 zan dar 10:30 khan State Refferal Hospital-ah a thi. Covid-19 vei a ni tih October 10, 2021-ah hmuh chhuah a ni a, October 16 aṭangin SRH-ah enkawl a ni.

November 27, Inrinni zing dar 3:10 khan Vanlalngengi (69), Chhiahtlang chu hripui vangin SRH-ah a thi a; Covid-19 positive a ni tih November 26, 2021 khan hmuh chhuah niin, SRH-ah enkawl nghal a ni tih sorkar thuchhuakin a tarlang.

Manglentiali (41), Tahan, Myanmar lam mi, Siachangkawn, Siaha district-a awm mek pawh nimin chawhnu dar 2:05 khan chu Siaha DCHC-ah thi a, Covid-19 vei a ni tih November 27, 2021 khan hmuh chhuah niin, hripui a vei tih finfiah tûkah a thi a ni.