KHAWTHLIR

Thisen pe
November 27, Inrinni khan Pentecostal Youth Department (Mizoram) chuan Aizawl Civil Hospital blood bank-ah thisen unit 87 an pe a, tun kar Inrinni-ah pek leh an tum. KṬP, Chawlhhmun North Branch chuan an kohhran Hall-ah Aizawl Civil Hospital tan thisen unit 46 an pe a, petute mipa 39 leh hmeichhia pasarih an ni. KṬP, Hunthar Veng Branch pawhin an din champha pualin an kohhran hall-ah Synod Hospital tan thisen unit 32 an pe a, petute mipa 30 leh hmeichhia pahnih an ni.

Serlui tifai
Mizoram Pollution Control Board leh Maubawk Branch YMA chuan November 27, Inrinni khan Swachhta Action Plan hnuaiah Tlawng lui fintu Serlui tifaiin an hnatlang. Hnatlangte hian lui dunga plastic leh bawlhhlawh chi hrang hrang an chhar khawm a, AMC bawlhhlawh paihna hmunah an paih a ni.

MLA-in hawng
Chaltlang Branch YMA-in thlanmual in an sak thar chu November 27, 2021 khan bialtu MLA Vanlalhlana'n a hawng a, Chaltlang YMA-in a sak pum nana leibá an la neihte chu a rulh vek tur thu a sawi. In sakna atan hian Rs 4,15,100 hman a ni a, Vanlalhlana'n a MLA fund Rs 2,00,000 tumin, a bak zawng chu an veng chhunga mite'n an thawh khawm a ni.

Puantah zirhona
Ministry of Textile hnuaia Weavers Service Centre leh Thenzawl SDO Amol Srivastava te chuan Thenzawla puantahtu mimal leh pawl hrang hrangte tan November 26 leh 27, 2021 khan puantaha sumdawng company din dan (establishment of weaver producer company) zirhona an buatsaih a, puan tahtu mi 200 vel an tel.

NEDSCON vawi 26-na
North Eastern Diabetes Society (NEDS) chuan November 27-28, 2021 chhung khan online hmangin North Eastern Diabetic Society Conference (NEDSCON) vawi 26-na an hmang a, NEDS Mizoram Chapter-in an thleng. Conference chhung hian doctor-te'n zunthlum leh a kaihhnawih chungchangah thupui hrang hrang sawihona leh zirhona hun an hmang a ni.