Union Home Minister leh CM-te'n Buaina tel loa ramri sawi fel an rél

November 26, 2021 tlai dar 5 khan chief minister Zoramthanga leh Assam chief minister Himanta Biswa Sarma te chu Union Home minister Amit Shah hoin New Delhi-a a chenna inah an inkâwm a; buaina tel loa Assam leh Mizoram ramri sawi fel an rêl.

Mizoram sorkar thuchhuah tarlan danin, chief minister pahnih leh Union Home Minister hian ramri chungchang an sawi a, dawhkan khat kîl a, harsatna leh buaina tel loa sawi fel ngei ni se, an ti.

Chief minister level-ah a ni emaw, state pahnihte'n palai (delegation team) insiam emaw pawhin state pahnihte chu inbiak ni ṭhin se, boruak ṭha thei ang ber siam ni se, an ti bawk.

Assam Chief Minister chuan Mizoram Chief Minister nena Amit Shah an hmuh thu hi Twitter-ah a tarlang a, "State pahnihin inbiakna hmanga ramri buaina chingfel tur committee din turin thutlukna siam a ni. CM inbiakna pawh a ṭul anga neih a ni ang," a ti.