Beichhua'n a biala hmalakna a enfiah

Social Welfare minister Dr K Beichhua chuan November 27, Inrinni khan a bial Siaha chhunga Thiahra, Amotlah, Riasika leh Tipi Ferry khuate a tlawh a, SEDP kaltlanga Sericulture department-in pangang khawi ṭanpuina an pek aṭanga loneitu ṭhenkhat hmalakna leh anganwadi centre dinhmun a enfiah.

Dr K Beichhua chuan, "Mizoramin hun harsa kan tawh mek karah Zorama rorel turin Pathianin BJP, Congress leh ZPM-te a ruat lo a, kan fel vang leh ṭhat vang ni loin chief minister Pu Zoramthanga kaihhruai sorkar hi tun dinhmunah chuan Pathianin a ruat a ni," a ti.

A bial a tlawhnaa a thu ken ber chu ram mipui rilru siamṭhat a nih thu sawiin K Beichhua chuan, "Thil eng emaw tihsak tur che uin ka rawn kal lo a, rilru dik púa keimahni ṭheuh intodelh tura kan thawh rim a hun tawh tak zet tih thupui kengin ka rawn kal a ni. Hnam hnufual leh a hnuaihnunga awm reng tura duan kan ni bik lo a, kan thawh rim phawt chuan a hnuaihnung ber kan ni bik reng lo ang," a ti a; rilru puthmang a dik loh chuan hmasawnna a awm theih loh thu leh politician-te pawh tlak ngamin politics an khelh a hun tawh thu a sawi.

Minister hi MADC-a MNF Legislature Party leader HC Lalmalsawma Zasai, MDC HC Biakcheuva leh sorkar hotute'n an ṭawiawm a ni.