Minister hoin IFAD team hun hmanpui

FOCUS, Mizoram Project kalpui dan endiktu United Nations (UN) hnuaia International Fund for Agriculture Development (IFAD) pualin November 26, Zirtawpni khan Aijal Club-ah cultural programme buatsaih a ni a, Agriculture minister C Lalrinsanga'n a hmanpui.

C Lalrinsanga chuan, Agriculture leh a kaihhnawih kawng hrang hranga Mizoram mamawhte phuhru tura nasa zawka hma lakpuiah IFAD mithiamte a sáwm a, Mizoram sorkar chu IFAD tan a inhawn thu a sawi.

Minister chuan, IFAD mithiamte'n Champhai, Kolasib, Serchhip, Mamit, Saitual leh Khawzawl district-a mid-term evaluation an neih chhunga rawtna an siamte chu a taka kalpui a nih ngei theih nan FOCUS Mizoram hmalakna chu uluk lehzuala a lo enpui zel tur thu a sawi bawk.

Fostering Climate Resilient Upland Farming System (FOCUS) hi United Nations hnuaiah IFAD leh Mizoram sorkar chuan January 25, 2018 khan inremna siamin kalpui ṭan a ni a, US dollar maktaduai 79.30 sênna tur project a ni. Project-in a tum chu tlang ram loneitute'n sik leh sa inthlak zel mila agriculture leh a kaihhnawiha hmalakna an kalpui theih nana kaihhruaina leh an mamawh pek a ni.

FOCUS project hmang hian loneitute chu farmer interest group (FIG) hrang hranga kuah khawm niin, tlang ram lo neih dan ṭha zawk zirtir te, thlai kumhlun chìn dan mumal zirtir leh chìn tur pek te, ran vulh dan awmze neia kalpuite leh kawng hrang hranga kut hnathawktute kaihhruai leh an mamawhte pea hmalakna kalpui a ni.