Lalchamliana'n a biala khaw 11 a tlawh

Minister Lalchamliana chuan November 23-27, 2021 chhung khan a bial, Hrangturzo chhunga khua zinga 11 - Pilêr, Mualchéng, Biate, Sailulâk, Léng, East Lungdar, Bâwktlang, Lungkawlh, North Vanlaiphai, Lungchhuan leh Sialsír khuate a tlawh a, bial chhunga hmasawnna hnathawh zawh tawh leh thawh mekte a hmunah a en.

Lalchamliana chuan thu sawiin, MLA fund chu khawtlang hmasawnna leh khawtlang tana ro tling tur siamna atana duan nih avangin contract hna dang anga hlâwk tuma thawh chi a ni lo tih a sawi a, "MLA fund hmanga hna thawktute pawh tam tak hlêp tuma thawk loin, khawtlang tana ro tling leh hmasawnna tur din tumna rilru pu chunga thawk turin ka bial mipui leh Zoram mipui ka ngen a ni," a ti.

MNF sorkar tirh aṭangin hriat lâwk loh harsatna hrang hrangin Mizoram a tlakbuak tih sawiin Lalchamliana chuan, "Covid-19 avangin India ram sum dinhmun nasa takin a tlahniam a, Mizoram pawhin kan hmuh tur ang sum kan hmuh theih loh phah. Chuti chung chuan Pathian ṭanpuina leh kan hotute ṭan tlànna avangin mipui ni tin mamawh hrang hrang khaihlak loin kan la awm thei a, sorkar hnathawk hlawh kan la inpe thei bawk," a ti. Zoramthanga kaihhruai sorkarin theihtawp a chhuah zel dawn tih sawiin, kum 2023-a inthlanpuiah pawh MNF dinhmun a ṭha hle niin a sawi bawk.

Home Minister hian Hrangturzo bial chhunga khaw tin hmasawnna tura hna thawhte leh hmachhawp awm mek chi hrang hrang zingah, khaw tinin tui hnianghnar zawka an hmuh theihna tura tui lakna tur solar pump thawh zawh tawh leh thawh mek te, power water pump siam zawh tawh leh siam mekte a hmunah a en a ni.