Tlawng lui leh a fintute humhalh duh

Green Mizoram Network (GMN) chuan November 26, 2021 khan Ṭamdilah inkhawmpui an hmang a, resolution siamin, Tlawng lui leh a fintute humhalh an duh thu an tarlang.

GMN chuan, Aizawl khawpui leh a chhehvela chêngte leh Lunglei khawpui mipui tui tlan ber Tlawng lui chu kum tin a tlem telh telh tih an tarlang a, "Tlawng leh a fintu, Pialthlèng lui, Tut leh Teirei, Tuikual luite bakah kawrtê, fûr laia tui luanna zawng zawngte kan zir chiang a, lui kam tuak ramngaw humhalh leh tihthianghlim a nih leh theih nan hma la turin Mizoram sorkar, tlawmngai pawl hrang hrang leh mi tin kan ngen a ni," an ti.

Mizoram lui 16 kam tuak (riverine reserved forest) ramngaw, The Mizo District (Forest) Act, 1955 hmanga humhalh chu a vaiin sq.km. 1,832.50 a nih thu tarlangin GMN chuan, "Heng lui kam tuak humhalhna dan, kum 65 chhung zet kan hman tawh chu January 27, 2021 khan Gauhati High Court, Aizawl Bench chuan a hnâwl (set aside and quashed) a, a pawi kan ti tak zet," an ti a; Gauhati High Court thutlukna dodala hma la mektu mimal leh tlawmngai pawlte an thlàwp tlat thu an tarlang bawk.