Minister-in chawimawina hun hmanpui

Tuikual South YMA Branch chuan November 26, Zirtawpni zan khan YMA Hall-ah an venga zirlai ti ṭhate chawimawina hun an hmang a, minister of state Lalruatkima, bialtu MLA-in a hmanpui.

Lalruatkima chuan, HSLC leh HSSLC zo hlimte'n zirna sang zawk atana an kalna tur kawng an thlan fimkhur a pawimawh thu sawiin, "Tum bik fel tak neia zirna kawng zawh a pawimawh a, mi hman tlak ni tura taimakna leh tumruhna nen zir a ṭul," a ti.

Nu leh pa leh zirlaite'n zirna chu investment pawimawh a ni tih an hriat chian a ṭul tih sawiin Lalruatkima chuan, "Mizo zingah all India leh central service-a tling an awm ngai ta meuh lo hi ka vei hle. State dangah pawh thuneihna chelh thei tura all India leh central service lamahte luh tum ang che u," a ti a; sorkar laipuiah kum tin hna ruak tam tak a awm laiin, Mizote zingah diltu an awm ngai mang lo chu pawi a tih thu leh inzar zau a pawimawh thu a sawi bawk.

Chawimawina hi Tuikual South YMA president Lalchhanlianan a kaihruai a; HSLC 79, HSSLC 55, under graduate 19, post graduate pariat, an vaiin zirlai 161 leh District Teachers Award dawngtu Michael Lalramliana te hnenah chawimawina an hlan a ni.